MÊRDÎN - Ame îdiakerdiş ke tepişteye Mizgîn Acara ke Zîndanê Tîpê Eyî yê Mêrdînî de ameyîne tepiştiş, hewl daya ke întîhar bikero. 

 

Mizgîn Acar nêzdîyê 5 aşman verî qezaya Midyadî ya Mêrdînî de ameye tepiştiş û sewqê Zîndanê Asayîşê  Berzî yê Xarpêtî ameye kerdiş. Mizgîne, 30ê êlule de seba roniştişê qerarî ardî Zîndanê Tîpû Eyê Mêrdînî. Bi îdiayê, “demê qedexeyê vejîyayîşê teberî yê Nisêbînî de tewrê pêrodayîşan bîya” cezaya muebbetî dayî Mizgîne. Ame îdiakerdiş ke Mizgîne badê qerarê behsê xebere, şewa 1ê teşrîna verêne de hewl daya ke Zîndanê Tîpê Eyî yê Mêrdînî de întîhar bikero. 

 

Mizgîna ke wedarnayî Nêweşxaneyê Perwerde û Cigêrayîşî yê Mêrdînî, derbazê beşê ewnîyayîşê awarte kerdî. Ame zanayîş ke tehlukeyê cuya Mizgîne hema zî dewam keno.