MERKEZÊ XEBERAN - Rojnamegere Serunaz Ehmed ya ke serewedaritişê "Jin, Jiyan, Azadî" de amebî tepiştiş, seba destûrê kontrolê doktoran nêame dayîş, bî 28 rojî yo grev de ya.

 

Tepişteya sîyasî ya nêweşe Rojnamegere û Çalakîkera Heqê Tutan Serunaz Ehmed ke Zîndanê Evînî ya Tehranî de yena tepiştiş, seba destûrê kontrolî û çimdarîyê doktorî nêame dayîş, 28 rojî yo grev de ya.

 

Goreyê agahîyê çalakîkerê heqê merdiman, Serunaz Ehmed fek dermanê endîşeyî (anksiyete) vera daya û xizmetê weşîye yê zîndanî red kena. Ame dîyarkerdiş ke Serunaz Ehmed vernîya nika zî wextê hêrişê serê hucreyê cinîyan ê zîndanê Êvîne de giran bî û wedarna nexweşxane.

 

Açarnayoxe, Çalakîkera Heqê Tutan û Rojnamegere Serunaz Ehmed teşrîna peyêne serra 2022yîne de pêwa mêrdeyê xo Kamyar Fekur, wextê protestoyê serewedaritişê "Jin, Jiyan, Azadî" de amebî destbendkerdiş. Verê zî bi sebebê "propaxandayê hemverê dewlete" û "kombîyayîş û komployê seba vîndîkerdişê asayîşê netewî" hetê Dadgeha Şorişî ya Tehranî ra 3 serrî û 6 aşmî cezaya zîndanî ci rê amebî birnayîş.