Melek Avci

 

ANQARA - Sîyasetmedara tepişteye Elîf Çetînbaş komployê mîyanneteweyî yê hemverê Rayberê PKKyî Abdullah Ocalanî de ercna û dîyar kerd ke paradîgmaya ke Abdullah Ocalan aver berda, dinya ser o tesîr kerda û resaya armancê xo. Elîfe vat, wa tîya ra tepîya komplokerî bifikrîyê.

 

Serrgêra komployê 9ê Teşrîna Verêne yê hemverê Rayberê PKKyî Abdullah Ocalanî de ame destpêkerdiş, kurdî û dostê kurdan reaksîyonê xo ardî ziwan. Sere de Kurdistan û Tirkîya de xeylêk welatîjî kewtî meydan û azadîya fîzîkî ya Abdullah Ocalanî û çareserîya problemê kurdî waştî.

 

Hemsereka HDPyî ya Mûşî û tepişteya nêweşe Elîf Çetînbaş ke zîndanê cinîyan ê Sîncanî de tepişte ya, derheqê komployî de persanê ma cewab kerd. 

 

*Serê komployê mîyanneteweyî yê hemverê Rayberê PKKyî Abdullah Ocalanî de 26 serrî derbaz bî. Bi nê komployî çi ame armanckerdiş?

 

Bi nê komployî sey Birêz Abdullah Ocalanî zî vato, waştî ke hêvî çin bikerê. Wexto ke qutîyê Pandora akerdî, xirabîyê sey merg û zulmî vila bî. Hêzê hegemonîk bi nê xirabî, zulm şaran rê kerdî. Gelo qutî de çîyêk mend? Bêşik mend; hêvî. Hêvî; newebîyayîş a, bîyayîş a. Mijdanîya roşnî ya. Birêz Ocalan hemverê çimsûrîyê kapîtalîzmî de Paradîgmaya modernîteyê demokratîke awan kerd.  Birêz Ocalan je cuya xo sey hêvî ercna, bi hemkarîya nê hêzê komplokeran ame tepiştiş. Nika  Îmrali de tepişte yo. Tirkîya heqê hêvî ke terefgirê ci ya pê nêana û sûcê merdimayî pê ana. Bi nê caardişan zî nêwazenê zerreyê hêvî verdê.

 

*Hêzê komplokerî yê ke komploya 9ê Teşrîna Verêne de ca girewtî, Rojhelatê Mîyanên de senaryoyê cîya kerdî cuye. Çîyo ke wazenê Rojhelatê Mîyanên de bikerê çî yo?

 

Rojhelatê Mîyanên zerrîya dinya yo û Kurdistan zî yê Rojhelatê Mîyanên o. Nê semedî ra hêzê mîyanneteweyî wazenê dinya bikerê binê tesîrê xo û coka zî Rojhelatê Mîyanên ser o senaryoyan xêz kenê. Senaryoyê Kasr-i Şîrîn û Sykes Pîcot yê tewr  bi tesîr bî. Şerê Israîl-Hamas û Israîl-Hîzbullahî nê ra xoser nîyo. Kurdistan ewilî bi Kasri Şîrînî mabêne Îran û Osmanîyan de dima ra bi Sykes Pîcotî bi destê Îngîlîstanî û Fransayî; Tirkîya, Îran, Iraq û Sûrîye ame parekerdiş. Hêzê hegemonîk ke her tim kaos ra wey bîyî, Rojhelatê Mîyanên de şer giran kerdî. La nê organîzasyonan hemverê kurdan de ser nêkewt. Şorişê Rojawanî dir zî Paradîgmaya Komelê Azadîwaştox ê Demokratîke, Ekolojîk û Cinî dinya de ame nasnayîş. Senaryoyê înan zî şî sergo ser.

 

*Goreyê şima hêzê komplokerî resayî armancê xo?

 

Çîyo ke ame armanckerdiş, çinkerdişê kurdan bi. Waştêne Kurdistan parçe bikerê. La eksê ci ame ciwîyayîş. Yê ke kitabê Abdullah Ocalanî wendê zanê û eşkenê nê vajê. Ez zî bi nimûneyêk qal bikerî. Ez sey kesêka ke ziwan û tarîxê xo nêzanayîne, kewta hewldayîşê musnayîşê ziwan û tarîxê xo. Mi bawer kerd ke Birêz Abdulah Ocalan tenê seba kurdan nê, seba pêro şarê dinya şans o û ewro 74 welatî bi serkêşîya roşnvîr, nuştox, aktîvîstan kampanya ‘Abdullah Ocalanî rê azadî, meselaya kurdî rê çareserîy sîyasî’ pê yeno. Paradîgmaya Birêz Ocalanî ya Modernîteyê Demokratîke unîversîteyan de sey ders yena dayîş. Coka no zî mojneno ke komplo nêresayo armancê xo. Tîya ra tepîya wa hêzê komplokerî bifikirîyê.”