Neslîhan Kardaş-Memîhan Zeydan

 

WAN - Taxa Karşiyaka ya Wanî de cinîyan derheqê krîzê ekonomî de ajansê ma rê ercnayîş kerdî û wina vatî: “Her çî vay o. Tutê ma baş wey nêbenê. Sebebê nê krîzî kesê ke 22 serrî yo îdarekarî de yê.  Serekkomar biwazo eşkeno peynîya nê krîzî bîyaro.”

 

Cinîyê bazarê taxe ya taxa Karşiyaka ya Rêya Armûşî ya Wanî de ameyo awankerdiş, derheqê krîzê ekonomî de qisey kerdî.

 

‘Mi nîmeyê lazimîyê xo girewt’

 

Gulîstan Gultekîn zî semedê vayî wina vat: “Vayî roj bi roje zêde bena. Çîyêk sey xo nêmaneno. Ma nêeşkenê lazimîyê xo bigîrê. Verê ma ameyîne bazaran me dayîş û girewtiş kerdêne. La nika ma nêeşkenê bêrê. Ma sebze û fêkî gênê, rojêke de qîm nêkeno. Edalet çin o. Min nîmeyê lazimîyê xo girewt.”

 

‘200 TL ra 6 lîra mend’

 

Fatma Kaval zî wina vat: “Her çî vay o. Meaşê asgarî qîm nêkeno. Hîn sebzeyî kîloya înan 50-60 lîra ya. Kes nêeşkeno çîyêk bigîro. Mi tay îsot, tay sebzeyê  tirşî girewt 200 TL 6 lîra mend. Mêrdeyê mi kal o û nêeşkeno bişuxilîyo. Emser meaşê teqawîtbîyayîşî gêno. Lajê mi meaşê asgarî gêno. No do qîmê çi bikero? Ma çar kesî keye de ciwîyenê. Feqîrî hîn feqîr benê, dewlemendî hîn dewlemend benê.”

 

‘Ma bi meaşê hîrê aşman debare kenê’

 

Turkan Yapici zî wina vat: “Mi erebokê xo pirr nêkerd la 300 lîra şî. Ez berardişan gêna, bi deyn gêna. Hîrê aşman ra reyke pereyê ci gêna. Ez bi meaşê xo yê hîrê aşman debara xo kena.

 

‘Tutê ma baş wey nêbenê’

 

Altun Ayna zî wina qal kerd: “Vayî zaf zêde ya. Tutê ma baş wey nêbenê. Ma nêeşkenê lazimî bigîrê, ma destveng agêrenê. Ez kîra de ya. Kîra vay a. Mêrdeyê mi înşat de şuxilêno. Ma 5 nifûs ê. Ma bi meaşê asgarî debare kenê.”

 

‘Serekkomar biwazo do krîz peynî bo’

 

Cinîya bi nameyê Sidika zî wina vat: “Ez seba tirşî ameya bazar. La sebze zaf vay ê. Kîloyê xiyaran 50 TL yo. Her çî vay o. Debara ma bi meaşê teqawîtbîyayîşî yo. Krîz destê serekkomarî de yo. Biwazo eşkeno lezkî peynî bikero.”