RIHA - Dewaya hêrişê hemverê keyeyê Şenyaşarî de derheqê pêro tepişteyan de qerarê tehlîye dîya. 

 

Pawitox û merdimê parlamenterê AKPyî yê verê Îbrahîm Halîl Yildiz 14ê hezîrana 2018ine de qezaya Pirsûsî ya Rihayî de hêrişê keyeyê Şenyaşarî kerdibî û hîrê ferdê keyeyî qetilkerdibî. Prosesê muhakemekerdişê hedîse dewam keno. Dima ra semedê hêrişê hemverê kargehê keyeyê Şenyaşarî û hêrişê nêweşxaneyî di cipersayîşê cîya amebî destpêkerdiş. Dima ra dosya kerdibî yew.  

 

Roniştişê 8ine ê dewa de her di hetî ra 4 ci ra tepişteyî, derheqê 30 kesan de amebî akerdiş, 3in Dadgeha Cezaya Giran ya Meletî de ameye kerdiş.  Tepişte Fadil Şenyaşar ke hêriş de pîyê ey û her di birayê ey ameyî qetilkerdiş Zîndanê Tîpa Tyê Hûmara 2yîn yê Amedî de bi SEGBÎSî tewrê roniştişî bî. Versucê bînî Enver Yildiz, Mekaîl Şîmşek û Celal Yildiz zî zîndan de tepişyeyê bi SEGBÎSî tewrê roniştişî bîyî. 

 

Ameyî tahlîyekerdiş

 

Emîne Şenyaşar ke qirkerdiş de mêrdeyê aye û di lajê aye ameyî qetilkerdiş, semedê problemê xo yê weşîye tewrê roniştişî nêbî. Avûkatê keyeyê Şenyaşarî roniştiş de amade bîyî. 

 

Roniştiş badê tespîtê nasnameyan dest pêkerd de, dozgerî mutalaya xo eşkera kerd. Dozgerî, waştişê tehliyeyê pêro versucanê tepişteyan kerd û waşt ke cipersayîş bêro hîrakerdiş. 

 

Avûkatê keyeyê Şenyaşarî yê hemverê mutalayî heqê qiseykerdişî girewtî, dîyar kerdî ke waştişê tehlîyeyê dozgerî ca de yo û waştişê tehliyeyê Fadil Şenyaşarî kerdî. Avûkatê versucê bînî zî eynî çî waştî. 

 

Dadgehe badê mabêne, qerarê tehlîyeyê pêro versûcan da. Dadgehe derheqê versûcan de qerarê “zîndanê keyeyî” da û roniştiş taloqê 21ê sibata 2025ine kerd.