Neslîhan Kardaş

 

WAN - Îdarekara MEDYA-DERî Berîvan Canbey derheqê polîtîkayê asîmîlasyonî yê hemverê kurdan û hêrişê hemverê kurdî de qisey kerd û wina vat: “Semedê wayîrvejîyayîşê ziwanê xo yew maddeyê muhîm o yo ke tutî kurdkî bimusû û ê diyîn zî şar bêro sazgehê ziwanî yê ke ameyê akerdiş.”

 

Îdarekara Komeleya Ziwan û Edebîyatî (MEDYA –DER) yê Tetwanî ke ame akerdiş, Berîvan Canbey derheqê hêrişê hemverê kurdkî de qisey kerd.

 

'Ganî ziwan bêro pawitiş'

 

Berîvane dîyar kerd ke hemverê ziwanê kurdkî de polîtîkaya şerê taybetî yena kerdiş û vat: “Seserra 21ine çîyo tewr muhîm ziwan o. Semedê nê zî hêrişê hemverê ziwanî zêde yê. Semedê şaro ke ziwan û  kulturî ra bêro birnayîş, çin beno û lazimî bi şerê teknîkî nêmaneno. La ma wareyê kultur û ziwanî de xurt bibê, ma ziwanê xo qisey bikerê, ma tu şerî de vînî nêkenê. Tesîrê şerî do nêmano. No şerêk o û ma  çiqas hemverê şerî ziwanê xo bipawê, ma do xurt bibê.”

 

‘Ganî ma hişmendîyê ziwanî vila bikerê’

 

Berîvane dewam de wina vat: “Amancê hêrişê hemverê kurdkî de çinkerdiş o û vernê de zî hêrişê ziwan û kulturî kenê. Çar parçeyê Kurdistanî de hêrişê ziwan û kulturî kenê. Semedê şexsê kurdî çin bikerê, vernê de hêrişê ziwanî kenê. Pêro netewî bi ziwanê xo yenê şinasnayîş. Wexto ke ma bi ziwanêk bîn xo îfade bikerê, ma kurdbîyayîş ra vejîyenê. Coka ziwan muhîm o. Ganî ma bi ziwanê xo qisey bikerê. Nê semedî ra ma hişmendîyê ziwanî awan bikerê û vila bikerê.”

 

‘Ganî ma kurdkî xo dir bidê ciwîyayîş’

 

Berîvane tewr peyîn dîyar kerd wayîrê sazgehê ziwanî vejîyê û vat: “Ganî vernê de tutê ma kurdkî qisey bikerê û bimusê. Tutî wexto ke newe qisey kenê teknolojî ser o tirkî musenê. Çîyo muhîm o yo ke ganî tutê ma kurdkî bimusê û ê diyîn zî ganî şarê ma bêro sazgehê ziwanî. Bi akerdişê kursan her çî nêqedêno. Ganî şar bêro sazgehan. Ganî şar wayîrê sazgehan vejîyo û seba ziwanî çalakî û bername pê bîyaro.”