Roza Metîna

 

ÊLIH - Nuştoxe û şaîre Mizgîn Ronak ke 30 serrî zîndan de mende û tewrê Fûarê Kitabanê Kurdî yê Êlihî bî bale ant serê hîkayeye xo ya nuşta û wina vat: “Eşqê min û kitabê kurdî hîn tutîtî de dest pêkerd. Merdim wexto ke tutîtî de eşqê kitaban hîs bikero no cîya yo. Zindan de zî mi dest wendiş û nuştişê kurdî ra vera nêda. Xora ganî zîndan de ti xo rê dinyayêke taybetî viraznê. Yan nê ti do binê linganê faşîzmî de çin bibê.”

 

Nuştoxe û şaîre Mizgîn Ronak ke 30 serrî zîndan de mende û tewrê Fûarê Kitabanê Kurdî yê Êlihî bî babetê muhîmîya ziwanê kurdkî ser o, bîyayîşê cinîyê nuştoxe a fûarê kitabanê kurdkî, hîkayeya xo nuşta û  muhîmîyê wayîrvejîyayîşê berardişê zîndanan kerd.

 

‘Ma bi kurdkî biciwîyê’

 

Mizgîn Ronak destpêk de da zanayîş ke ganî ziwanê kurdkî pratîk de aver şêro û wina vat: “Ma pêro deyndarê ziwanî yê. Ganî ma deynê xo yê semedê ziwanê kurdkî bidê. No zî encax bi qiseykerdiş û pratîkî pê bêro. Nika lazimî pratîkî yo. Ma lez bikerê bi kurdkî biciwîyê û bi kurdkî bidê ciwîyayîş.” 

 

‘Ganî ma nêbê hemkarê sûcê asîmîlasyonî’ 

 

Mizgîne dewam de wina vat: “Pawitiş cuyabîyayîş o. Coka ganî ma ziwanê kurdkî bi wendiş û musnayîşê ziwanê kurdkî yê tutan bipawê. Lazim o semedê nê her keyeyî bibê wendegehî, dadî û babî zî mamoste. Mamosteyê rastî xora dadî û babî yê. Ganî her keye nê rolê xo kay bikero. Ganî ma êdî nêbê hemkarê sûcê asîmîlasyonî.”  

 

‘Zîndan de ganî tu xezîneyêke bi destê xo virazênê’

 

Mizgine bale ant ferqiyê mabêne nuştişê zîndanî û teberî ser o û wina vat: “Teber de şansê nuştişî zêde yo. Zîndan de ti tena asin û dêsan vînena. Tu her tim eynî merdiman vînena. Teber de xezîneyêke semedê nuşteyî est a labelê zîndan de ganî ti xezîneyêke bi destê xo viraznê. Yanî zîndan de nuştiş zor o labelê çîyo zor zî weş o.” 

 

Hîkayeya Mizgîne ya zîndanê Êlihî

 

Mizgîne qalê zîndanê Êlihî kerd û wina vat: “Ez zîndanê Êlihî de zî menda. O wext tena kovarêke ma ya Rewşene est bî. Ma a kovare sey çimanê xo pawitêne. Xêrcê aye çîyê ke ma yê kurdkî çinbî. O wext ancî qedexe zêde bî. Tewr tay ma a kovare 15 rey wendêne. Ma nêzanayîne senî biniminê. Semedo ke xezîneya ma tena na kovare bî. Pêşangehê dorê ma pirrî kitab ê. Ez şexsê hîkayeya xo de vajî, ez ê rojan ra ameya na roje. No zî semedê mi bextewarîyêke yo.”

 

Venga wayîrvejîyayîşê berardişê zîndanan 

 

Mizgîne tewr peyîn venga wayîrvejîyayîşê berhem û nuştoxê zindanan de yê kerd û vat, ganî kesêke înan bi tena nêverdo û vat, mektubêke bo zî semedê nuştoxê zîndanan xeylêk muhîm o.