MÊRSÎN - Şubeyê ÎHDyê Mêrsînî eşkerayîya xo ya semedê sererastkerdişê qerarê dadgehe yê derheqê Hatîce Onaran de venga rayapêroyî kerd ke bikewê mîyanê têgêrayîşî.

 

Şubeyê Komeleya Heqê Merdiman (ÎHD) ê Mêrsînî reaksîyon vera tepiştişê Endama Komîsyonê Zîndanê Şubeyê ÎHDyî ya Stenbolî û se ra 79 astengdare Hatîce Onaran ke bi îdîayê "Pêşkêşîyê malîye kerda" 4 serrî û 2 aşmî cezaya zîndanî ci rê birnabî, mojna.

 

Kombîyayîşê awanîya komeleye de ame vatiş, “Zextê pawitoxan ser o vindarnê.” Sewbîna, pankartê "Hatîce Onaran tena nîya" ame akerdiş.

 

Sekreterê Şubeyê ÎHDyî yê Mêrsînî Bekîr Sitkî Keçecî kombîyayîş de qisey kerd û dîyar kerd ke dayîşê pereyan ê semedê zîndanî suc nîyo. 

 

Bekirî, dîyar kerd ke pêro muameleyê zîndanan, hetê  personelê îstîmlakî ra yenê taqîbkerdiş û nîno qebûlkerdiş ke kesê pere dayê "rêxistinêke" dir bêrê girêdayîş, no muhakemekerdiş hemverê huqûqî yo.