Memîhan Zeydan

 

Şaredarîya Tuşba ya Wanî weçînayîşê Adare de kewte destê Partîya Têduştî û Demoraksî (DEM Partî). Şaredarî verê destê AKPyî de bî û xebatêke derheqê cinîyan de nêamebî kerdiş. Badê cû hetê DEM Partî ra ameye îdarekerdiş, dezgehê ke hetê walîtî ra amebî padayîş newe ra ameyî akerdiş û xebatê cinîyan ameyî destpêkerdiş û qursî ameyî akerdiş.

 

Hemşaredara Tuşbayî Hanim Akkoç derheqê xebatanê cinîyan de qisey kerd.

 

‘Ma qursê ke amebî padayîş newe ra akerdî’

 

Hanime wina qalî kerd: “Xêrcê çend qursê neqş û deştîşî çîyêk çînî bî. Binê nameyê merkezê cuye de cayêk est bî, la wexto ke DEM Partî ame îdarekarî, Walîtî uca pada û qursê ci betal kerd. Ma qursê ke ameyî padayîş, newe ra akerd. Badê semedo ke Halk Egîtîmî mamosteyanê xo ant, dezgeh ancî ame padayîş.”

 

‘Semedê akerdişê merkezê cuye yê cinîyan ma şuxilênê’

 

Hanim Akkoş dîyar kerd bi israr kurs newe ra akerdê û wina vat: “Ma do giranî bidê kursê ke cinî eşkenê xo aver berê û berardiş bikerê. Ma do kursê wendiş, nuştiş, enstruman û hunerê destan abikerê. Peynîya nê qursan de ma do belgeyê westayî bidê. Ma hewl danê kursê ke îstîhdam kenê, abikerê. Ma nika semedê akerdişê Merkezê Cuye yê Cinîyan şuxilênê. Demêk nêzdî de ma do abikerê.”

 

‘Do dewamê şayîya tutan bêro’

 

Hanime tewr peyîn wina vat: “Bi amancê têkoşînê hemverê desteştişî û tîryakî komîsyon xebatan keno. Ma di taxan de şayîya tutan kerd. Rojêke weş bî. Ma şayîya bafirokan pê ard. Waştî ke no bername dewam bikerê. Heta ke şert û mercê hewayî dest bidê ma do dewam bikerê. Ma do demêk nêzdî de  daranê vame û gozan ronê.”