AMED - TJA, DBP û DEM Partî neql kerdî ke do hemverê tayînkerdişî qeyûmî yê şaredarîyê Êlih, Mêrdin û Xelfetî, Semtê Ofîse yê Amedî de saete 15.00 de rayîrşîyayîş bikerê û venga tewrbîyayîşî kerdî. 

 

Wezaretê Karê Zereyî, Şaredarîya Bajarê Pîlî ya Mêrdînî û şaredarîyê Êlih û Xelfetî yê Rihayî rê qeyûm tayîn kerd. Tayînkerdişê qeyûman do Amed de bi rayîrşîyayîşêk bêro protestokerdiş. Têgêrayîşê Cinîyanê Azadan (TJA), rêxistinê Partîya Herêmê Demokratîke (DBP) û Partîya Têduştî û Demokrasî (DEM Partî) yê Amedî derheqê rayîrşîyayîşî de eşkerayî da.  

 

Hemserekê DEM Partî yê Amedî Abbas Şahîn reaksîyon mojna û vat: “Ma vînenê ke îqtîdaro sîyasî semedê dewamkerdişê aqilê dewlete darbe kerd. Ma îqtîdarê sîyasî rê vanê ke problemo tewr muhîm nê welatî aştîyêke birûmet o. Hem prosesêk danê destpêkerdiş, hem zî darbeyê qeyûmî kenê. No çî mojneno ke şima zerrî ra nîyê. Ma hemverê nê de vinderê û şarê ma do hemverê darbeyê qeyûmî îradeyê xo bimojno. Ma hemverê nê darbeyê sîyasî yê faşîst, pêwa şarê Amedî ma do verê AZC Plazayê Ofîse ra heta Meydanê Şêx Seîdî rayîrşîyayîş bikerê. Ma wazenê ke pêro dezgeh û şar tewr bibê. No şar do bi tu hawayî rayîr nêdo sîstemê qeyûmî. Ma do ewro saete 15.00 de vernîya AZCî ya Ofîse de kom bibê û ver bi Meydanê Şêx Seîdî rayîr ra şêrê. Ma pêro şarê xo dawet kenê.”

 

Badê zî Hemsereka DBPyî ya Amedî Sûltan Yaray qisey kerd û vat ke şaredarî aydê şarî yê. Sultan Yaraye vat je ganî her kes hemverê faşîzmê AKP-MHPyî de vengê xo berz bikerê û venga tewrbîyayîşê rayîrşîyayîşî kerd.