WAN - Hemşaredara Rêya Armûşî Canan Uzunay, bale ant serê xebatê ke semedê cinîyan yenê kerdiş û vat: "Nika xebatê nîmcetî yê wextê qeyûman de mendê temam kenê. Çarçewaya waştişê tutan, ciwanan û cinîyan de plansazî kenê."

 

Şaredarîya Bajarê Pîlî û qezayê Wanî badê 31ê Adare pêroyî de 14 şaredarî kewtî destê Partîya Têduştî û Demokrasî (DEM Partî). Hemşaredarê cinî nika yew rey lez dayî xebatê cinîyan û hewl danê ke xo biresnê pêro cinîyan.

 

Derheqê xebatan de Hemşaredara Rêya Armûşî ya Wanî Canan Uzunay ajansê ma rê qisey kerd. 

 

Canan Uzunay, destpêk de wina vat: "Wexto ke qeyûm ame tayînkerdiş, sere de mudurîyê cinîyan betal kerdî. Mîyanê 8 serran de pêro xebat û xizmetê cinîyan hedef ameyî girewtiş. Xeylêk sazgehê cinîyan ameyî padayîş û wareyê cuye yê cinîyan werte ra ameyî wedaritiş."

 

Xebatê nimced mendî temam kenê

 

Canan Uzunay, dîyar kerd ke hewl danê xebatê ke nimced mendê temam bikerê û wina vat: "Ma hewl danê ke Merkezê Cuye yê Maya reyke bîn bikerê mîyanê xizmetî. Ma sere de problemê cinîyan ê şaredarî goşdarî kerd. Ma waştişê înan goşdarî kerd. Ma sozê ke pîya bajarê xo îdare bikerê da.”

                                                                 

Semedê tutan, ciwanan û cinîyan xebate

 

Canan Uzunay, dewam de wina vat: "Qeyûm, kurdistan de hemverê ziwan û kulturî de hêrişan keno. No sebeb ra ma hewl danê Mala Dengbêjan qeza de abikerê. Xebatê ma dewam kenê. Sewbîna Bostanîci de awanîyêke ma est a û ma do bikerê Merkezê Cuye yê Cinî û Ciwanan. Mîyan de kursê enstrumanan bidê, kursê wendiş û nuştişê bi kurdkî bidê destpêkerdiş."

 

Canan Uzunay, wina qedêna: "Ma; ciwanan, tutan û cinîyan dir ameyî têhet û ma çarçewaya waştişê înan de plansazîyê stratejîk ê 5 serran vet. Ma nê bingehî de xebatanê xo kenê.”