Elfazî Toral

 

STENBOL - Cinî, qetilkerdişê cinî û tutê ke roj bi roje zêde benê sey "Qirkerdişê cinsî" ercnayîş û wina vatî: “Pêro tutî û cinîyê ameyê qetilkerdiş sebebê wedaritişê ma yo. Ma vînenê ke têgêrayîşêk rêxistinkerde kuçeyan de vila bîyo. Ma do têkoşînê xo berê kuçeyan û serewedaritişê xo pîl bikerê.”

 

22 serrî yo îqtîdarê AKPyî de vernîya polîtîkayê qetilkerdişê cinî û tutan ameyî akerdiş û her roje cinî  û tutî rastê hêrişî yenê. Tirkîya de bîlançoyê qetilkerdişê roj bi roje giran beno. Îqtîdar polîtîkayê xo de israr keno û cinî zî hemverê nê de kuçeyan de têkoşînê xo xurt kenê. 

 

Cinîyan derheqê şîdet û qetilkerdişî de ercnayîş kerdî.

 

‘Bi metodê îşkenceyî cinî yenê qetilkerdiş’

 

Meclîsê Cinîyê Ciwanan ê Kongreya Demokratîke ya Şaran (HDK) Şevval Çaşurluk wina vat: "Qetilkerdişê cinî û tutî bi destê serdestîyê camêrdî yenê kerdiş. Qetilkerdişê polîtîk ê. 21ê Tebaxe de dewa Çulî ya Amedî Narîn Guran ya 8 serrî vînî bî û cenazeya aye 8ê êlule de Çemê Egertutmaz ame vînayîş. Şikdarî erey ameyî muhakemekerdiş. Ancî Edîrnekapi de di canî ameyî qetilkerdiş. Her roje hemverê cinî û tutan de hêrişî yenê kerdiş. Cinî û tutî hawirêk nêasayîş de ciwîyenê.”

 

‘Ganî ma hemverê hêrişan de bê’

 

Şevval Çaşurluk zî wina vat: “Tutî pîl benê û tewrê têkoşînî benê. Hem Kurdistan de hem Tirkîya de hawirê polîtîk de pîl benê. Hemverê polîtîkayê qirkerdişî de têkoşînê rêxistinkerde ferz o. Ganî ma têhet ca bigîrê. Ganî ma hemverê hêrişan de bê. Unîversîteyan de her cayî de sloganê ‘Jin Jiyan Azadî’ bîyo serewedaritişê hemverê sîstemê. Amancê ma oyo ke ma bi nê têkoşînê erneternasyonal pîl bikerê.”

 

‘Ma serewedaritişê xo kuçeyan de pîl kenê’

 

Kordînasyonê Cinîyan ê Partîya Sosyalîst Doga Karakuş zî wina vat: "Netîceya polîtîkaya bêcezaverdayîşê îqtîdarî de her roje cinî û tutî yenê qetilkerdiş. Qetilkerdişê cinî û tutî netîceya polîtîka bêcezaverdayîşî yo. Ma cinî kuçeyan de çalakîyê xo dewam kenê. Ma serewedaritişê xo rêxistin kenê. Ma venga pêro cinîyan kenê ke ma pîya kuçeyan de têkoşînê xo pîl bikerê.”

 

‘Pawitişê cewherî heq o’

 

Meclîsê Kede yê HDKyî Meral Îlker zî wina vat: “Tirkîya de asayîşê cinî û tutan çin o. Feqîrî giran bîya û no beno sebebê bêasayîşê cinî û tutî. Cuya ma her wareyî de binê rîskî de yo. Ma nê sîstemê serdest qebûl nêkenê. Qetilkerdişê cinîyan semedê înan normal yeno vînayîş. Ma nê qebûl nêkenê. Ma sere wedarnê. Ganî ma vengê xo berz bikerê, têkoşîn bikerê û pawitişê cewherî pê bîyarê. Pawitişê cewherî heq o.”

 

‘Ganî hukmat bivuryo’

 

Meclîsê Cinîyan ê DEM Partî Fatoş Ekîcî wina vat: “ Hema hedîseya Narîn Guran roşn nêbîya her roje ma bi xeberêke bîn şîyar benê. Dewlete vera ke serê nînan de vindero, ma dir eleqedar beno. Hevalê ma destbend kenê û tepişnenê. Ganî cinî kuçeyan de bê. Ganî vengê xo berz bikerê. Ganî no hukmat bivuryo.”