AMED - Şaredarîya Bismilî yewin kombîyayîşê meclîsî yê aşma teşrîna peyêne de rayaumumî rê akerde kerd. Fikr û pêşnîyazîyê welatijê ke beşdarê kombîyayîşî ame qeydkerdiş.

 

Şaredarîya Bismilî ya Amedî, semedê rayaumumî tewrê pêro mekanîzmayê qerargirewtişî yê çarçewaya paradîgmayê Demokratîk, Ekolojîk, Azadîya Cinî de bibê, kombîyayîşê xo yê fermî yê aşma teşrîna peyêne rayaumumî dir akerde kerd. Hemşaredarê Bismilî Mizgîn Ekîn, Guven Tanrikulu, hemşaredar, îdarekarê DEM partîye yê Bismilî û xeylêk welatîjî beşdarê kombîyayîşê parkê Vedat Aydin bîyî.

 

Hemşaredara Bismilî Mizgîn Ekîn kombîyayîşê  meclîsî ke xeylêk pêşnîyazî ameyî kerdiş de qisey kerd û pêro kesî beşdarê kombîyayîşî bîyî silam kerd û dîyar kerd ke şaredarîya şarî yê şefaf esas girewtê û qerar dayê ke kombîyayîşê xo rayaumûmî dir abikerê. Sewbîna vatî, ê talîmatê şarî bica anê. 

 

Badê qiseykerdişan ewnîyayîşê û pêşnîyazîyê welatijê beşdarê kombîyayîşî bîyî ameyî girewtiş û tayînkerdişê qeyûman ê Şaredarîya Bajarê Pîlî yê Mêrdînî, Êlih û Xelfetî ame protestokerdiş.