Rozerîn Gultekîn

 

STENBOL - Sîyasetmedara kurde Sebahat Tuncel da zanayîş ke polîtîkaya qeyûman darbe ya û wina vat: “Sebebê rejîmê qeyûman, destbendkerdiş û tepiştişan meseleya kurdan a. Nê semedî ra zî heta ke meseleya kurdî çareser nêbo, nê meseleyî zî çareser nêbenê. Ma aştîye biwazê ganî ma îtîrazê nê polîtîkayan bikerê.”

 

Semedê Şaredarîya Bajarê Pîlî ya Mêrdînî, Şaredarîya Êlihî, Şaredarîya qezaya Xelfetî ya Rihayî yê ke binê îdarekarîya DEM Partî de yê û semedê şaredarîya Esenyurtî ke DEM Partî CHPyî dir pêkerdiş kerdib û ame weçînayîş, qeyûm ame tayînkerdiş. 

 

Siyasetmedara kurde Sebahat Tuncel derheqê polîtîkayanê qeyûman de ercnayîş kerd.

 

‘7 serrî û nîm de Tirkîya de tu çî nêvurya’

 

Sebahat Tuncel dîyar kerd rejîmê qeyûmî; xesp o, darbeyê hemverê îradeyê şarî yo, hemverê têkoşînê heq û azadîye yo. Sebahat Tuncele dewam de wina vat: “Wexto ke ma 2016ine de ma tepiştî, sîstemê hemserekî kerdî bahane û qeyûm tayîn kerdî. Ma zîndan ra vejîyayî, eynî çî vernîya ma de yê. 7 serrî û nîm de Tirkîya de tu çî nêvuryayo. Ez nê polîtîkayan reyke bîn şermezar kena. Ma zaf rey vat, eke hemverê nê polîtîkaya qeyûmî nêro padayîş, do siba biresê bajaranê Rojawanî zî. Ganî ma nê bêhuqûqî ra vajê bes o. Eke ê rayîr bidê nê caardişan, do siba bêro sereyê înan zî. Ganî sere de CHP û pêro Tirkîya ganî hemverê qeyûmî de bi hawayêk xurt vengê xo berz bikerê.”

 

‘Ma aştîye biwazê ganî ma îtîraz bikerê’

 

Sebahat Tuncel dewam de wina vat: “Her kes nê metodî dir ameyo rî bi rî. Hetêk ra semedê çareserî gamêke erzenê, hetêk ra zî qeyûman tayîn kenê. Na rewşêke bêro qebûlkerdiş nîyo. Ganî pêro hêzê  demokrasî nê bivînê. Ma aştîye biwazê ganî ma îtîrazê qeyûman bikerê. Babeta qeyûmî tenê xespkerdişê şaredarîyan nîya, qeyûm vurnayê rejîmê îdareyî. Şar weçîneno la îqtîdar memurê xo tayîn keno. No bêrêzdarîyêk pîl hemverê şarî yo. Nê semedî ra ganî pêro şar bêro têhet û îtîrazê xo bikerê.”

 

‘Heta ke meseleya kurdî çareser nêbo tu mesela zî çareser nêbena’

 

Sebahat Tuncel tewr peyîn wina vat: “Pêkerdişê bajarî, ferza demokrasî yo. Yê caardişê hemverê demokratîk, rejîmê yew kesî esas gênê, dişminê demokrasî yê. Zanê ke serkewtişê sîstemê demokratîke vîndîbîyayîşê înan o. Nê semedî ra wazenê zemînê têkoşînî yê hempar şarê Tirkîya û kurdan werte ra wedarnê. Hedefê înan oyo ke çareserîyêk ke îqtîdarê înan xurt keno, bidê qebûlkerdiş. Çîyê yenê kerdiş, bi amancê vernî girewtişê sîyasetê aştîye yo. Sebebê rejîmê qeyûman, destbendkerdiş û tepiştişî, meseleya kurdî yo. Nê semedî ra heta meseleya kurdî çareser nêbo, nê meseleyî zî çareser nêbenê. Eke ma aştî wazenê, ganî ma îtîrazê nê polîtîkayan bikerê.”