Rojda Aydin 

 

ÊLIH – Cinîyê ke çalakîyan de ca gênî, dîyar kerdî ke qeyûm tayînê îradeyê şarê kurdî û bi taybetî zî îradeyê cinî ameyo kerdiş û vatî ke do heta peynî xoverdayîşê xo dewam bikerê. 

 

Badê ke qeyûm tayînê Şaredarîya Êlihî ame kerdiş, merkez, taxî û kuçeyî bi rojano xoverdayîşêk pîl de yê. Polîs bi her tewir hêriş keno. Şar zî bi xoverdayîş cewab dano. 4ê teşrîna peyêne ra çalakîyê ke bajar de dewam kenê, her roje heta ereyê şewe dewam kenê.

 

Cinîyê ke çalakî de qemerayê ma rê qisey kerdî û vatî, heta peynî do xoverdayîşê xo dewam bikerê. 

 

‘Êdî bes o zilm û zorî' 

 

Huri Acar, dîyar kerd ke tayînkerdişê qeyûmî nîno qebûlkerdiş û vat: "No îradeyê ma yo. Ma bi rayanê xo hemşaredaranê xo weçîna. Ma tu wext qeyûman nêwazenê. Bi tayînkerdişê qeyûman zilm kenê. Ganî şarê Êlihî pêro wurzo lingan ser û wayîrê îradeyê xo vejîyo. Bêrê ma pîya şaredarîya xo peyser bigîrê. Îradeyê ma yo, şeref û namûsê ma yo. Ewro pay danê serê îrade û namûsê ma. Êdî bes o zilm û zorî. Wa peynîya nê zulmî bêro. Venga mi pêro dayîkê  Êlihî yo ke vejîyê meydanan.”

 

‘Wazenê îradeyê cinî çin bikerê’

 

Endama Meclîsê Şaredarîya Êlihî Çîgdem Bîlem zî wina vat: "Qeyûm tayînê hemşaredaran nê, îradeyê şarî rê ameyo kerdiş. No qeyûm bi taybetî tayînê îradeyê cinî ameyo kerdiş. Wazenê ke îradeyê cinî  desteser bikerê. Labelê ma tîya yê û ma tîya ra nêşinê. Bi 8 serrî yo timî qeyûm tayînê şaredarîyan kenê û şaredariyan de tu çîyêk nêverdayê. Xêrcê dizdî. Dest dayê malê şarî ser. Labelê bi tayînkerdişê qeyûman amanc çinkerdişê îradeyê şarî û cinî yo. Ma şarê xo dir ê. Ma fek têkoşînê xo ra vera nêdanê."

 

‘Şar ewro tîya yo û xo ver dano’

 

Endama Meclîsê Şaredarîya Êlihî Tugba Demîr, wina reaksîyon mojna: "No qeyûm tayînê îradeyê şarî ameyo kerdiş û bi taybetî zî îradeyê cinî ser o ameyo kerdiş. Wazenê hêzê cinî qût bikerê û vernîya cinî padê. Ma fek têkoşînê xo ra vera nêdanê. Ma do kuçe û taxan de bê. Ma venga pêro şar û cinîyan kenê ke bêrê wayîrê îradeyê xo bivejîyê. Têkoşîno ke şarê Êlihî ewro dano, semedê ma xeylêk pîroz o. Semedo ke şar nêterseno. Waştî ke bi hêrişan şarî bitersnê labelê şar nêterseno. Şar tîya yo û xo ver dano. Ma bi şarê xo serberz ê."  

 

'40 serrî yo no xoverdayîş ameyo na sewîya’

 

Sîdar Onat zî wina bale ant ser: "Qeyûm, zilm o û zordestî yo. Wazenê bi hêriş, gaz û îşkence nê şarî bitersnê. Labelê no şar nêterseno. Eke tersê înan bibayîne, do no xoverdayîş nêameyîne na sewîya. Ma qeyûm nêwazenê û destê xo şaredarîyanê ma ra biancê. Ma şer nêwazenê. Ma bi rayanê xo şaredarî girewta. Wa qeyûm şêro. Ma weşî û azadîye wazenê. Wa destê xo aştî rê derg bikerê. Merdimayî serkewtiş o. Heta ke no zulm dewam bikero, ganî tîya ra tepîya şar timî kuçeyan de bo. Ê çiqas qeyûm tayin bikerê zî do no şar ancî şaredarî bi dest bikero."

 

‘Ma fek kuçeyan ra vera nêdanê’

 

Meyase Akdag zî wina vat: "Çend rojî yo ma nê meydanan de xo ver danê. Ma nê zilmî û qeyûmî qebûl nêkenê. Şaredarîya ma rûmetê ma ya. Êlih rûmetê şarê kurdî yo. Ma şer nê, aramî wazenê. Lezkî wa şaredarîya ma bidê ma. Heta ke ê dest şaredarîya ma ra nêancê, ma do tîya bê û ma do xo ver bidê. Şaredarîyê ma keda şarê ma yê. Wa baş bizanê ke ma do şaredarîya xo destanê înan de nêverdê. Çira nê zulmî ma rê kenê? Ka edalet û merdimayî. Heq û huqûq nêmendo. Ma heq, huqûq û edalet wazenê. Lezkî wa şaredarîya ma ra vejîyê û şêrê. Heta ke ê nêşêrê ma do kuçeyan de bê. Xoverdayîşê ma do dewam bikero. Serkewtiş yê şarê kurdî yo."