Elfazî Toral

 

STENBOL - Tesmîlkarê partîyê sîyasî ke reaksîyon vera qeyûman mojnayî û vatî: “Ewro bi sîyasetê qeyûmî wazenê heqanê ma destanê ma ra bigîrê. Siba zî do azadîya ma destê ma ra bigîrê. Nê semedî ra zî ganî şar wayîrê îrade û azadîya xo vejîyo. Roj roja şirawitişê kesê ke qeyûm tayîn kerdê yo. Ma venga têkoşînê pêro şaran kenê.”

 

Çalakîyê hemverê tayînkerdişê qeyûman ê semedê şaredarîyê DEM Partîye yê Mêrdîn, Êlih û Xelfetî dewam kenê. Hem Tirkîya, hem Kurdistan de çalakîyê protestoyî pê yenê. Welatîjî hemverê xespkerdişê îradeyê bireaksîyon ê. Temsîlkarê partîyê sîyasî hemverê tayînkerdişê qeyûman ajansê ma rê qisey kerd.

 

Parlamentera DEM Partîya Stenbolî Çîçek Otlu da zanayîş ke nê rojanê tarîxî de AKP-MHPyî hêrişê hemverê kurdan zêde kerdê û vat: “4ê Teşrîna Peyêne 2016ine de hemserekê pêroyî yê HDPyî Fîgen Yuksedag û Selahattîn Demîrtaş, xeylêk parlamenterê ma û endamê MYKyî destbend bî. Eynî tarîxî de qeyûm tayînê şaredarîyê Mêrdîn, Êlih û Xelefetî kerdî. Îradeyê şarî xesp kerdî. Nê hêrişî hemverê destkewtişê cinîyan ê. Hemverê kultur û ziwanî yê.”

 

‘Dewlete hewl dana şarî bifetêsino’

 

Resîme Karabaş zî dîyar kerd ke AKP-MHP bi polîtîkayê hewl danê ke şarî bipelçiqnê û wina vat: “Amancê nê hêrişan çinkerdişê şarê kurdî yo. Şarê kurdî rayanê xo dano, îradeyê xo. Tayîp nê çî qebûl nêkeno. Bi zor û tedayan şaredarîyan xesp kenê. Qeyûman tayîn kenê. Ganî ma hemverê nê de bêveng nêmanê û tena temaşe nêkerê.” 

 

‘Wext wextê şirawitişê qeyûman o’

 

Sereka Pêroyî ya Partîya Bindestan ê Sosyalîstî (ESP) Denîz Aktaş zî dîyar kerd, qeyûman dir pêro şar hedef ameyo girewtiş û wina vat: “Nê hêrişî eynî wextî de hemverê pêro kedkar û karkeran o. Hemverê têkoşînê înan de hêrişêk babeta vatişî ya.  AKP şovenîzmê xo dir şarî jehr keno. Roj roja xoverdayîşî ya. Ez venga pêro kesan kena ke vejîyê kuçeyan û  qeyûman bişirawê.”