Rozerîn Gultekîn

 

STENBOL - Temsîlkarê rêxistinê cinîyan dîyar kerdî ke qetilkerdişê cinîyab û tutan yê ke yenê ciwîyayîş tesaduf nîyê û nê semedê polîtîkayê îqtîdarî pê yenê. Cinîyan vatî, ganî îqtîdar vera teşwîqkerdişê ke tutan viraznê, wa tutan bipawê.

 

Netîceya polîtîkaya îqtîdarî de şîdetê qetilkerdişê cinîyan roj bi roje zêde beno. 22 serran de cinî û tutî bi merg, qetilkerdiş û şîdetî dir ameyî rî bi rî. Amed de tuta 8 serrî Narîn Guran ameye vînîkerdiş û 19 rojî dima cenazeya aye ameye vînayîş. Şîrîn Elmas Hanîlçî ya 6 serrî zî badê vînî bî, di rojî badê cenazeya aye goristanê Ferîkoy ê Stenbolî de ameye vînayîş. Stenbol de şikdar Semîh Çelîk di cinîyan bi metodê DAIŞî qetil kerd.

 

Temsîlkara Federasyonê Femînîstê Ciwanan Guneş Fadîme Akşahîn û temsîlkara Platformê Ma do Kiştişê Cinîyan Vindarnê (KCDP) Şîrîn Yalincakoglu derheqê qetilkerdişî de qisey kerdî.

 

Wezîfeyê hukmatî pawitişê tutan o

 

Guneş Fadîme Akşahîn wina qalî kerd: “Wezîfeyê hukmatî oyo ke tutan keyfweş bikero. La nê nêkeno. Ma vînenê ke tutê binê berpirsyarîyê keyeyî de yenê terkkerdiş û wayîr înan rê nîno vetiş. Wezareta Keye û Komelî ganî taqîb bikero gelo cuya tutan keye de senîn a? Babeta cuya perwerdî de, astengîyê ke keye vejeno, wezaretê perwerdeyî berpirsîyar o. La ma vînenê ke nê çî nînê kerdiş. Caardişê nê merdişê tutan vejeno werte. Şikdarê desteştişî yenê beratkerdiş. No zî vernîya desteştişî akeno. Keyeyî şîdet tutan rê kenê, dewlete vernîya nê panêdana.”

 

Qetilkerdişê tutan polîtîkaya keyeyî ra xo ser nîya

 

Guneş Fadîme Akşahîn zî da zanayîş ke ê mecbûr manenê Sûran ser, verê goristanan de eşkerayîye bidê û vat, ganî polîtîkaya ke cinî û tutan pawenê bêrê awankerdiş û wina vat: “Ganî Peymana Lanzarote û qanûnê 6284 pê bêro. Qetilkerdişê ke yenê kerdiş netîceya polîtîkaya ke îqtîdarê sîyasî pê ano. Komel xo bi xo nêrijêno, sebebê nê nêpawitişê cinî û tutan o. Sebebê nê pawitişê şikdaran o.”

 

Şîrîn Yalincakoglu zî wina vat: “Tutê binê kontrolê dewlete de nê, binê kontrolê tarîkatan de ameyê verdayîş. Feqîrîya tutan problemo tewr pîl yê welatî yo. Semedê ewnîyayîşê tutan, meaşê asgarî qîm nêkeno. Ganî dewlete wayîrê tutan vejîyo. Ma do semedê nê têkoşînê xo dewam bikerê.”