ÊLIH - Cinîyan venga semedê tewrbîyayîşê mîtîngê "Demokrasî û Azadiyê" kerdî, dîyar kerdî ke mîtîng tena hemverê xespkerdişê îradeyî nîyo, eynî wextî de hemverê polîtîkayanê tecrîd û qirkerdişê cinîyan o.

 

Platformê Sazgehê Demokratîk, derheqê "Mîtîngê Demokrasî û Azadîye" ke do 17ê Teşrîna Peyêne de Êlih de bêro kerdiş, vizêrî Sendîkaya Petrol Îşî de eşkerayî da. Mîtîngo ke hem Tirkîya ra û hem zî çar hetê Kurdistanî ra hemwelatîjî do tewr bibê, do Basîn de bêro organîzekerdiş. Mîyanê amancê mîtîngî de qeyûmê ke tayînê şaredarîyan û polîtîkayê tecrîdî yê Rayberê PKKyî Abdullah Ocalanî ser o zî est ê.

 

'Ma do hemverê polîtîkayê tecrîdî de bibê veng'

 

Endama Meclisa Partîya Demokrasî ya Şaran (HDP) Sema Koç, wina vat: "Na eşkerayî de ma qetî kerd ke nê munaqeşeyan de muxatabo rastî Abdullah Ocalan o. Do xeylêk bajaran ra şar beşdarê nê mîtîngî bibo. Eynî wextî de ma do taxe bi taxe, kuçe bi kuçe amadekarîyê mîtîngî dewam bikerê. Ma bajaro ke qeyûm ameyo tayînkerdiş û îradeyê şarî ameyo peyfoşkerdiş de yê. Ma fikrîyenê ke ganî êdî şarê kurdî hemverê na polîtîkaya qeyûmî vejîyo û ganî hukmatê AKP-MHPyî rêze îradeyê şarî rê bigîro. 3 rey qeyûm ame tayînkerdiş, çareserî nêvirazîya û do nêbo zî. Ma do nê mîtîngî de hem hemverê qeyûmî û hem zî hemverê tecrîdî de vengê xo berz bikerê. Semedê azadîya Birêz Ocalanî ma do nê têkoşînî dewam bikerê. Ma tayînkerdişê qeyûman semedê weçînayîşî yê şarê kurdî qebûl nêkenê. Ma desteserkerdişê îradeyê şarê xo qebûl nêkenê. Ma do têkoşînê xo dewam bikerê."

 

7 serre ra heta 70 serre rê venga her kesî ame kerdiş ke tewrê mîtîngî bibê

 

Sema Koç, dîyar kerd ke 7 serre ra heta 70 serre venga tewrbîyayîşê mîtîngî kenê û vat: “Ma pêro kesî, cinî, ciwan û kesê hîsgêrî yê serê nameyê aştî û azadîye de dawetê mîtîngî kenê. Semedo ke aştîyêke pê bêro, ma her kesî dawetê mîtîngî kenê ke tecrîdê Îmraliyî peynî bibo û wareyê cuya azadî bêrê awankerdiş.”

 

'Babeta sereyîn yê mîtîngî tecrîd o'

 

Aktîvîsta Têgêrayîşê Cinîyanê Azadan (TJA) Ruken Zeryam Işik zî dîyar kerd ke mîtîngê 17ê teşrîna peyêne semedê înan xeylêk muhîm o û vat: “No xoverdayîşo ke beno, hemverê qeyûm û desteserkerdişê îradeyî yo. Semedê şaredarîyanê ma reya hîrêne qeyûm ame tayînkerdiş. Mîyanê saetêke de yenê û destkewtişanê ma desteser kenê, îradeyê şarî peygoş kenê. Ma nê çî qebûl nêkenê. Muhîmîyê mîtîngo ke ma organîze kenê, tena semedê qeyûmî nîyo, eynî wextî de hemverê polîtîkaya şerê taybetî ke komelî çin kena, hemverê qetlîamê cinîyan, fuhuş û tiryakî yo zî. La babeta sereyîn, tecrîd o. Heta ke tecrîdê Îmraliyî nêro şikinayîş, no şer peynî nêbeno û tecrîd bingehê şerê taybetî yo.”

 

'Bêrê ma mîtîng de wayîrê destkewtişê xo vejîyê'

 

Rûken Zeryam Işik, bi taybetî cinî û ciwanî, pêro şarê Êlihî dawetê mîtîngê 17ê teşrîna peyêne ya Meydanê Gulîstanî kerd û vat, “Ma pîya nê tecrîdî bişikinê û pêro destkewtişê ke bi keda xo bi dest kerdê, bipawê. Bêrê ma semedê komelêke azad û têduştî bêrê têhet.”