STENBOL - Avûkatê Buroyê Huqûqî yê Asrînî semedê pêvînayîşê muwekîlê xo Rayberê PKKyî Abdullah Ocalanî dir, muracatê Serdozgerîya Bûrsayî û Mudurîyê Zîndanê Îmraliyî kerd.

 

Avûkatanê Buroyê Huqûqî yê Seserre ra Razîye Ozturk, Rezan Sarica, Faîk Ozgur Erol û Mazlum Dînç semedê pêvînayîşê bi Rayberê PKKyî Abdullah Ocalan ke Zîndanê Padayeyê Tîpê Fyî yê Asayîşê Berzî yê Îmraliyî de yeno tepiştiş, Serdozgerîya Komare ya Bursayî û Midûrîyê Zîndanê Îmralî muracat kerd. 

 

Heto bîn ra avûkatan, semedê pêvînayîşê Omer Hayrî Konar, Hamîlî Yildirim û Veysî Aktaş zî hem muracatê dozgerî û hem zî midûrîyê zîndanî kerd. 

 

Xeylê serdayîşê semedê pêvînayîşê Abdullah Ocalanî, Omer Hayrî Konar, Hamîlî Yildirim û Veysî Aktaşî nînê cewabkerdiş. Pêvînayîş, her 6 aşmî ra reyke hetê Dadgerîya Înfazî ya Bursayî ra bi sebebê “cezaya disiplînî” yenê astengkerdiş. 

 

Qedexeyê pêvînayîşî avûkatan dir temamê Rewşa Awarte (OHAL) ra temmuza 2016ine de dewam kerd û no çî heta sibatê 2018ine dewam kerd. Waştişê pêvînayîşî yê avûkatan dimayê nê tarîxî ra her 6 aşme ra reyke ame reynakerdiş û heta ewro dewam keno. Qerarê qedexeyê pêvînayîşî yê semedê 6 aşmî yê tewr peyîn zî 3yê gulana 2024ine de hetê Dadgerîya Înfazî ya Bursayî ra ame dayîş.

 

Qerarê peyîn dir mîyanê 8 serran de tewr tay 13 rey semedê 6 aşmî cezaya pêvînayîşî avûkatan rê ame dayîş. Abdullah Ocalan badê tecrîdê mûtleqî yê 43 aşmî, 23yê teşrîna verêne de birazayê xo Omer Ocalan dir pêvînayîş kerdibî.