RIHA - Dayîka tepişteyo Çetîn Dagtekîn, Peyam Dagtekîn, dîyar kerd ke yewine sebebê surgunkeedişê tepişteyan, nasnameyê kurdbîyayîşî yo û vat: “Yê ke desteştiş û cînayetan yenê tepiştiş, yenê veradayîş. La wexto ke dore yena tepişteyê sîyasî nînê dermankerdiş. Semedo ke semedê ziwanê xo têkoşîn kenê.”

 

Tepişteyo bi nameyê Çetîn Dagtekîn ke badê ame tepiştiş, berdîya zîndanê Tîpê Tyê Hûmara 2yîn ê Rihayî, 23 serrî û 4 aşmî ceza ci rê ameye birnayîş. Çetîn Dagtekîn ke demêk zîndan de tepişya, surgunê Zîndanê Asayîşê Berzî yê Suluca yê Edeneyî ame kerdiş.

 

Dayîka tepişteyî Peyam Dagtekîn derheqê babete de ajansê ma JINNEWSî rê qisey kerd.

 

Cigêrayîşê fekî

 

Peyam Dagtekîn dîyar kerd ke destbendkerdiş de îşkence lajê aye rê ameyo kerdiş û wina vat: “Verê wexto ke zîndanê Curnêreşî de bî, ma her hewte vînayîne. La badê cu berdî Edene, ma êdî timî nêeşkenê şêrê. Zulm hem ma rê û hem lajê mi rê kenê. Kerdê hucreya yew kesî. Nêbenê doktor. Wexto ke benê nêweşxane, cigêrayîşê fekî kenê. O zî no qebûl nêkeno û ancî ey peyser şirawenê. Semedê nasnameyê kurdbîyayîşî nînan kenê.”

 

Tepişteyî nînê dermankerdiş

 

Peyam Dagtekîn dewam de wina vat: “Ma hesreta tutanê xo yê. Ma bi zehmetî şinê verê berê zîndanan. Hewteyê verê ez şîya, ez hema zî nêweş a. Verê wexto ke ma şîne, ma tepişteyanê bînan zî vînayîne. La nika wina nîyo. Nînê eynî salone. Kenê beşê cîya cîya. Nêverdenê kes silam bido yewbînan. Tepişteyî nînê dermankerdiş. Nê kesî semedê ziwanê xo têkoşîn kenê. Do no 23 serrî senî derbaz bibo.”

 

‘Ma do şîyayîşê pêvînayîşan dewam bikerê’

 

Peyam Dagtekîn wina peynî ard: “Badê ke lajê mi ame surgunkerdiş, ma hetê ekonomî, manewî de zehmetî ant. La se beno wa bibo, ma do şêrê pêvînayîş. Tepişteyan kenê hucreyê yew kesî. Nêverdenê bêrê têhet. Rojê vîyarte de lajê mi vat, hevalê ey hucre de hişê xo ser şîyo. Badê ke ey ra veng nêşinawitê, dayê beran ro û gardîyanî wina ameyê. Çîyo ke yeno kerdiş zulm o. Wazenê tutanê ma bipelçiqnê.”