Neslîhan Kardaş

 

WAN - Aktîvîsta TJAyî Aynûr Sarica, ver bi 25ê Teşrîna Peyêne bale ant serê normê ke netew-dewlet cinîyan rê ferz kenê û wina vat: “Ma do hemverê tecrîd, qetilkerdişê cinîyan, deseştişê tutan de têkoşîn bikerê. Ma do felsefeya jin jiyan azadî biciwîyê. Ma bi ruhê paştîdayîşî pêro kesî dawetê meydananê 25ê Teşrîna Peyêne kenê.” 

 

Ver bi 25ê Teşrîna Peyêne aktîvîsta Têgêrayîşê Cinîyanê Azadan (TJA) Aynûr Sarica qisey kerd.

 

‘Ma wazenê protestoyan pîl bikerê’

 

Aynur Sarica qiseykerdişê xo de bale ant têkoşînê cinîyan ser û vat: “Ver bi 25ê Teşrîna Peyêne Kurdistan de çi qewimyeno, ma nê ser xebatan kenê. Cinî, hemverê sîstemo ke heme çîyan rê dest derg keno, ziwanê xo derg keno, bedenê cinî, fikrê cinî rê derg keno, qebul nêkena. Pîya cuya xo, bi îradeyê xo aver berda. No Tirkîya û Kurdistan de bi protestoyan keweno cuye. Ma wazenê nê protestoyan pîl bikerê.”

 

‘Şerê taybetî vejîya sewîyeya tewr cor’

 

Aynûr Sarica dewam de wina vat: “Tirkîya û Kurdistan de şerê taybetî vejîya sewîyeya tewr cor. Sîstemo ke wazeno bedenê cinî ser laver bero, açarya rejîmê stratejîk. Dem yeno bi hêzê asayîşî, dem yeno bi mecrayê cîya keno. Bi her hawayî hêrişan dewam kenê. Yê ke tewr zêde tesîr benê zî cinî yê. Hetê ekonomî de zî tesîrêk pîl cinîyan ser o beno. Cinîyan sey xizmetkar vînenê. La cinî bi hişmendî, bîyî wayîrê zanebîyayîş ke ganî tewrê têkoşînî bibê.”

 

‘Ganî tecrîd bêro wedaritiş’

 

Aynûr Sarica bale ant tecrîdî ser û wina vat: “Çîyê ke ewro yenê ciwîyayîş, pêro girêdayeyê tecrîdê Birêz Ocalanî ser o yê. Demo nê kenê, vernê de tecrîd kenê giran. Semedo ke problemî bêrê çarserkerdiş, ganî vernê de tecrîdê Abdullah Ocalanî ser o bêro wedaritiş. Fehmê netew dewlete ca nêdano cinîyan. Ma nika şinê 25ê Teşrîna Peyêne û sloganê ma, ‘Hemverê şîdetê camêrdan de jin jiyan azadî’ yo.”

 

‘Ma pêro cinîyan dawetê meydanan kenê’

 

Aynûr Sarica tewr peyîn wina vat: “Ma wazenê cayê ke cuya azad ameyê awankerdiş de biciwîyê. Ma do hemverê tecrîd, qetilkerdişê cinîyan, desteştişê tutan de têkoşîn bikerê. Ma do felsefeya jin jiyan azadî ke dinya de vila bîya, biciwîyê. Ma bi ruhê paştîdayîşî pêro kesî dawetê meydanê 25ê teşrîna peyêne kenê.”