Derya Ren

 

RIHA - Dayîka Hasan Atmaca ke zindanê Amedî de îşkence dîyo, Muzaffer Atmacaya 89 serrî dîyar kerd ke a wazena xoverdayîşê hemverê qeyûman de ca bigîro û vat, semedê weşîye nêeşkena tewr bibo. Muzaffer Atmaca wina vat: “Bîyayîşê mi nîno zanayîş zî ez qeyûman qebûl nêkena.”

 

Yew kesa ke wazena tewrê çalakîyan bibo dayîka Hasan Atmaca ke zindanê Amedî de îşkence vînayo, Muzaffer Atmaca 89 serrî ya. Muzaffer Atmaca dewa Cibînî ya Xelfetî de ciwîyena û pêwa emrê xo rojeve zî taqîb kena.

 

Ma keyeyê aye de serdayîşê Muzaffer Atmaca kerd û bi gopale xo ma pêşwazî kerd.

 

Hemverê xoverdayîşî de rîyo huyaye

 

Muzaffer Atmaca ma rê nê pers kerd: "Xoverdayîşê nobete senîn derbaz beno?" Wexto ke ma vat, baş o, rîyê aye huya û wexto ke kamera vîna va ke belkî lajê mi Hasan Atmaca mi bîvîno.

 

Bîyayîşê mi nîno zanayîş zî…

 

Muzaffer Atmaca bi kelecan qisey kerd û vat: “Kes bîyayîşê mi nêzano zî ez qeyûman qebûl nêkena. Ma hende merdiman raya xo da hemşaredaranê xo. Heqê merdiman çin kerdî. Kam eşkeno heqê yewî destê yewî ra bigîro? Çira qeyûman tayîn keno? Ez zî wazena şêrî nobete la nêeşkena şêrî. Mi zaf ant. Ne Almanya, ne Hollanda ne Belçîka mend ke ez pey lajê xo şîya. Semedo ke o surgun o. 8 serrî verê berê zîndanan de bîya. Badê ke lajê mi vejîya, mecbûr mend şêro.”

 

‘Heq yê ma yo ma ser kewtî’

 

Muzaffer Atmaca tewr peynî wina vat: “Heq yê ma yo û ma ser kewtî. Ez pey hemşaredaranê xo ya. Ez nêeşkena şêrî, ez pey paştîya şima de ya. Mi raya xo daya. Çira bi zor gênê? Çi destê mi ra bêro ez kena. La ez nêeşkena şêrî nobete. Wazenê wa mi bigîrê. Ez 90 serrî ya do mi se bikerê? Çend serrî ma pawitêne ke ma şaredarî bigîrê. Ma girewt. La çira heqê ma xesp kenê?”