Derya Ren

 

RIHA - Temsîlkara Hemsereka Meclîsê Kantonê Firatî Mizgîn Xelîl da zanayîş ke Tirkîya bi hêrişê xo paradîgmaya Neteweyê Demokratîke hedef gêna û wina vat: “Pêwa pêro hêrişan ma do paradîgmaya Neteweyê Demokratîke mende bikerê û bipawê. Nê semedî ra ganî her kes dorê Îdareyê Xoserî de bibo yew.”

 

Tirkîya û komê paramîlîterî yê giredayeyê ci, Heyetî Tehrîr El Şam, hemverê wareyê ke binê Îradeyê Xoserî de yê, hêrişî dayî destpêkerdiş. Hêrişan de sîvîlî hedef ameyî girewtiş, bi desan kesî ameyî qetilkerdiş û seyan kesî zî birîndar bîyî.

 

Temsîlkara Hemsereke ya Meclîsê Îdareya Kantonê Firatî Mizgîn Xelîl derheqê babete de JINNEWSî rê qisey kerd.

 

‘Derbeyê pîlî dayî çeteyan ro’

 

Mizgîn Xelîl kewtişê rejîmê Baasî yê badê hêrişê HTŞyî pê ame de ard vîr û vat: “Tirkîya nê hêrişan îmkan dî û bi çimsûrî hêrişê wareyanê ke binê kontrolê Îdareyê Xoserî de yê kerd. 14 serrî verê kurdan bi têkoşînêk pîl şoriş kerd û heqê xoîdarekerdişî bi dest kerdî. Tirkîya hucreyê çeteyan Mincib de kerd dewre. Netîceya nê hêrişan de sivîlî ameyî qetilkerdiş. Hedefê hêrişan yewîya şaranê tîysa yo. Waştî ke mabêne kurd û ereban de pêrodayîş vejê. Wazenê bi polîtîkaya şerî xo bîyaye bikerê. La QSD, YPG û PYJyî xoverdayîşêk pîl mojna. Darbeyê giran da çeteyê girêdayeyê Tirkîya ro.”

 

‘Yê ke yenê kerdiş sucê şer û merdimayîye yê’

 

Mizgîn Xelîl bale ant kerdişan ser û vat: “Hêrişê hemverê Minbicî de sîvîlî hedef ameyî girewtiş. Nê dir zî sînordar nêmendî. Hêrişê hemverê Eyn Îsa de keyeyêk ame qetilkerdiş. Kobanê de tutê ke mektebî ra agêrayîne hedef girewtî. Sûcê şerî ame ciwîyayîş. Goreyê Peymana Cenevreyî, çîyê ke uca de ameyî kerdiş, sûcê şer û merdimayîye yê.”

 

‘Waştî Kobanê zî hedef bigîrê’

 

Mizgîn Xelîl dewamê qiseyê xo de wina vat: “Hêzê garantor hemverê hêrişan de bêveng mendî. Her kes hemkarê nê hêrişan o. La wa baş bizanê, ma do xoverdayîşê xo, bîyayîşê xo dewam bikerê. Do bi rihê Kobanê xoverdayîş dewam bikero. Kobanê bî zerrîya şorişî. Semedê înan zî bî kanser. Bi hêrişên hemverê Minbicî waştî ke Kobanê zî hedef bigîrê. La hêzê ma nê veng vetî.”

 

‘Ma do paradîmaya Neteweyê Demokratîke bipawê’

 

Mizgîn Xelîl wina qedêna: “Şerwanan Kobanê de tarîxê xoverdayîşî newe ra nuştî. Şehadetî virazîyayî la ma senî DAIŞî herra xo ra vet, ma do çeteyê Tirkîya zî vejê werte. Sozê ma semedê şarê ma û şehîdanê ma est o. Ma do taqîbkerdoxê mîrasê înan bibê. Ma do paradîgmaya Neteweyê Demokratîke mende bikerê. Ma do bipawê. Ganî her kes dorê Îdareyê Xoserî de bibo yew.”