Melek Avci

 

ENQERE - Parlamentera Katalonyayî Eulâlîa Reguant da zanayîş ke ganî komelê mîyanneteweyî tehdîdê DAIŞî û Şorişê Rojawanî newe bîyaro xo vîr û vat: “Îdareyê xoserî dir paradîgmaya Birêz Ocalanî ke 10 serrî yo yena qiseykerdiş, yewin pêşnîyazîyê demokratîkbîyayîşê Rojhelata Mîyanên o. Nê semedî ra ganî her kes goş bido vatişanê Birêz ocalanî û tecrîd bişikino. Yewin rayîr no yo.”

 

Parlamenterê DEM Partî yê Rihayî Omer Ocalan 23yê teşrîna verêne de Îmraliyî de Rayberê PKKyî Abdullah Ocalan dir pêvînayîş kerd û Abdullah Ocalan dîyar kerdibi ke semedê aştîye her tim amade yê la tecrîd dewam keno. Eynî wextî de Abdullah Ocalanî pêvînayîşî de vatibî: “Ma eşkenê na mesela bi diyalogî çareser bikerê. Ma na mesela serra 2000î de zî çareser bikerdêne. 1999ine de mi vat, ez eşkena çareserî rê xizmet bikerî. Nika zî vana. Vatî ‘Apo, semedo ke xo xilas bikero nê keno.’ La ma hema zî a noqta de yê û hema zî babeta ke  parlamento de yena qiseykerdiş na ya. Serre 2024 a, hema pêrodayîş, hema bêçareserî est o.”

 

Badê nê pêvînayîşî, heyetêk mîyanneteweyî semedê pêvînayîşê Abdullah Ocalanî dir 3yê Kanûne de ame Anqara. Parlamentera Katalonyayî Eulâlîa Reguant zî heyet de bî û çimdarîyê xo yê nê serdayîş de ard ziwan.

 

‘Tirkîya semedê wedaritişê tecrîdî game nêeşta’ 

 

Parlamentera Katalonyayê Eulâlîa Reguant wina vat:  “Semedê serdayîşê Birêz Ocalanî û şikinayîşê tecrîdî, ma ameyî Tirkîya. Tirkîya pêşnîyazîyê semedê heqê tepişteyan ca nêana. Xeylêk sazgehê mîyanneteweyî yê ke vanê ganî tecrîd peynî bibo, est ê. Ma Stenbol de bîyî. Ma pêvînayîş avûkatanê Ocalanî dir kerd. Ma rêxistinê heqî dir pêvînayîş kerd. La çîyo ke ma dî Tirkîya metodê huqûqî yê mîyanneteweyî ca nêana.”

 

‘Yewin keso ke no şer vindarno Birêz Ocalan o’

 

Eulâlîa Reguant dewam de vat: “Ma vanê Birêz Ocalan mifteyê çarserîye yo û yewin keso ke nê pêrodayîşî werte ra wedarno. Abdullah Ocalan bi fikrê çareserîya demokratîke, eşkeno bibo mifteyê çareserîya şerê Rojhelatê Mîyanên. Wexto ke pêrodayîşê Sûrîye dest pêkerdî ma Anqara de bîyî. Yewin çîyo ke ma endamê delegasyonî fikrîyenê, şikinayîşê tecrîdî yo. Semedê azadbîyayîşê Birêz Ocalanî eynî wextî de çareserîya pêrodayîşî herême ya.”

 

‘Semedê Rojawanî feydeyîn o’

 

Eulâlîa Reguant vat, ganî bi lezkî tecrîd wurzo û vat: “Îdareyê xoserî dir paradîgmaya Birêz Ocalanî ke 10 serrî yo yena qiseykerdiş, yewin pêşnîyazîyê demokratîkbîyayîşê Rojhelatê Mîyanên a. Coka her kes goş bido vatişanê Birêz Ocalanî û tecrîd bişikino. Yewin rayîr no yo. No eşkeno bibo paradîgmaya Sûrîyeya newe awankerdiş. Nê semedî ra ganî her kes waştişê şikitişê tecrîdî bikero. Paradîgma semedê Rojhelat û Sûrîye feydeyîn a.”

 

‘Ma bi vengêk berz paradîgma qal bikerê’

 

Eulâlîa Reguant tewr peyîn wina vat: “Ganî ma sewîyeya mîyanneteweyî de vengê kurdan berz bikerê. Ganî ma paradîgmaya Birêz Ocalanî qal bikerê. Ganî ma nika semedê şikinayîşê tecrîdî vengê xo berz bikerê. Ganî komelê mîyanneteweyî tehdîdê DAIŞî û Şorişê Rojawanî newe ra bîyaro xo vîr. Pawitişê babeta kurdî muhîm a.”