Melek Avci

 

ANQARA - Francesca Baruffaldî û Caterîna Posterîno ke mîyanê heyetê mîyanneteweyî de ca girewtî, bale antî rolê azadîya Abdullah Ocalanî ser o û vatî: “Tanasîyona Rojhelata Mîyanên berz bîya û demêk winasî de babeta kurdan de ganî goreyê pozîsyonê Abdullah Ocalanî têgêrayîş bibo. No muhîm o.”

 

Şerê Sûrîye û Rojhelatê Mîyanên her ke şino xidar beno û hetê Rayberê PKKyî Abdullah Ocalanî ra waştişê aştîye ancî yeno kerdiş. Parlamenterê Rihayî yê Partiya Têduştî û Demokrasî (DEM Partî) Omer Ocalan badê çend serran dima 23ê teşrîna verêne de şi Îmraliyî û pêvînayîş kerd. Pêvînayîş de Rayberê PKKyî Abdullah Ocalanî dîyar kerd ke eşkeno meselaya kurdî çareser bikero.

 

Badê nê pêvînayîşî, heyetêk mîyanneteweyî semedo ke Abdullah Ocalanî dir pêvînayîş bikero, 3ê kanûne de ame Anqara. Nameyê Konfederasyonê Karkeran ê Pêroyî yê Îtalyayî ser o Francesa Baruffaldî heyet de ca girewte. La Confederazione Generale Italiana del Lavoro (CGIL Lombardia), Francesca Baruffaldî û temsîlkara Federazione Lavoratori della Conoscenza (FLC CGIL) Caterîna Posterîno ke heyetî de ca girewtêne, derheqê serdayîş û şerê Rojhelatê Mîyanên dewam keno de ercnayîşê xo ard ziwan.

 

‘Waştişê ma azadîya Abdullah Ocalanî yo’

 

Francesca Baruffaldî û Caterîna Posterîno dîyar kerdî ke semedo ke mesajê Abdullah Ocalanî esas bêro girewtiş, serdayîşê Tirkîya kerdê û vat, rewşa zîndanan zî hetê heyetî ra yena taqîbkerdiş. Francesca Baruffaldî û Caterina Posterîno wina vatî: “Sey heyetê parlamenterê parlamentoya Ewropayî pê yeno, amancê ma waştişê azadîya Abdullah Ocalanî û vengdayîşê ey yê semedê aştîye esas bêrê girewtiş o.”

 

‘Ganî aştî bêro qiseykerdiş’

 

Francesca Baruffaldî û Caterîna Posterîno dîyar kerdî ke şerê Rojhelatê Mîyanên û Sûrîye babeta kurdan dir nêeşkena xoser bêro destgirewtiş û wina vatî: “Şero ke her ke şino giran beno, ganî esasê pozîsyonê Abdullah Ocalanî de têbigêrê. Nê wextê ke tansîyona Rojhelatê Mîyanên hende berz de ganî babeta kurdan, goreyê pozisyonê Abdullah Ocalanî  bêro destgirewtiş. Ma rê no mûhîm o. Ganî lezkî aştî bêra qiseykerdiş û bikewa rojeve.”

 

‘Aştî pêro şaran eleqeder kena’

 

Francesca Baruffaldî û Caterîna Posterîno dewam de wina vatî:” Rewşa Rojawanî her tim zehmet bî. Tirkîya babeta Sûrîye de rolê sereyîn de ya, dest planê xo yê vakurê welatî ra vera nêdana. Semedê hêzê mîyanneteweyî nika çîyo muhîm aştî û têduştî nîyo, cuya merdiman muhîm nîyo la çi heyf muhîm çeke û hêz ê. Çîyê ke çend rojî yê hemverê modelê Rojawanî de pê yenê, xêr nîyê. Paştdayîş ra zêdeyêr verê xo danê çîyanê cîya. Ganî aştî her kesî eleqedar bikera. No semedê ma esas o.”