Derya Ren

 

EDENE - Dayîkê Aştîye derheqê hêrişê Tirkîya û SMO yê hemverê Vakur û Rojhelatê Sûrîye de qisey kerdî û vatî, dewamê tecrîdî de hêrişî dewam kenê. Dayîkê Aştîye dîyar kerdî ke hêriş Kobanê rê bêro kerdiş, do tehlukeyêk pîl vejîyo werte û vatî, Kobanê hêvîye şaran o.

 

Serkêşîya Platformê Sazgehê Demokratîke (DEKUP) de, çarçewaya kampanyaya "Abdullah Ocalanî rê, meseleya kurdî rê çareserî” 16ê kanûnê de Amed ra ver bi Anqara bi wedaritişê tecrîdî, vindarnayîşê hêrişê hemverê Vakur û Rojhelatê Sûrîye "Rayîrşîyayîşê Çareserîya Demokratîke û Azadîye" ame destpêkerdiş. 

 

Dayîkê Aştîye yê Edeneyî tewrê rayîrşîyayîşî bîyî, derheqê hêrişê Tirkîya yê hemverê Vakur û Rojhelatê Sûrîye de qisey kerdî.

 

‘Kobanê hêvîye şaran o’

 

Şemsê Bagdu, bale ant serra 2014ine ser û vat: "Ma nêwazenê eynî rewşa serra 2014ine de Kobanê qewimyayî biciwîyê. Senî ke o wext merdimî ameyî  surgûnkerdiş, do nika zî koçber bibê. Ma aştî û edalet wazenê. Wazenê kurdan çin bikerê. Eke hêrişê Kobanê bikerê, do felaketê pîlî rî bidê. Kobanê hêvîye şaran o. Wa fek nê şerê lişînî ra vera bidê. Ganî êdî çeteyê şima hêrişê şarî nêkerê. Ma vînenê ke çete çi xirabî kenê. Ma do heta dilopê gonîya xo ya peyîne  têkoşînê xo dewam bikerê.

 

‘Ez xoverdoyaxan silam kena’

 

Dayîka Aştîye Tenzîle Turgay zî wina vat: "Ez hêrişê Rojawanî şermezar kena. Wa peynîya nê polîtîkayanê şerî yê ke ma ser de kenê, bîyarê. Êdî bes o, tutanê ma qetil mekerê. Ti vanê qey semedê asayîşê şarî ti şiyî uca la ti zûran kenê. Kobanê ê ma ya. Biciwîyo xoverdayîşê Rojawanî. Ez kesê ke uca de xo ver danê silam kena.”

 

‘Ganî berê Îmraliyî bêrê akerdiş’

 

Fatma Kaplan zî reaksîyonê xo wina ard ziwan: “Tutanê kurdan yenê qetilkerdiş. Ma şer nêwazenê. Rojawan ser o kayêk lişîn yeno kaykerdiş. Coka ma do rayîr ra şêrê. Ganî berê Îmraliyî abibê. Semedo ke  çareserîya meseleyan Îmrali yo. Rojawan de sîvîlî yenê qetilkerdiş. Hêvî kena no rayîrşîyayîş bibo sebebê aştî û azadîye.” 

 

Ayşe Alagaş zî dîyar kerd ke hêrişê Rojawanî dewam kenê û vat: “Heta ke destê ma ra bêro ma do têkoşîn dewam bikerê. Ma tecrîdê Îmraliyî şermezar kenê. Dewamê tecrîdî hêrişê ewro yê Rojawanî yê. Ma sey şarê kurdî, bîyaye bîyî û ma do bîyayîşê xo dewam bikerê. Kurdan tu wext sereyê xo nêtewêna.”