Gulîstan Gulmuş

 

ŞIRNEX - Halîme Encuya ke lajê xo Serhat Encuyo 17 serre qirkerdişê Roboskî de vînî kerd, dîyar kerd ke pêwa ke hema şikdarî nêameyê muhakemekerdiş, selahîyetdarî semedê serê hedîse padê, tazmînatê ekonomî pêşnîyaz kenê û vat: “Vera edaletî, bi pereyan hewl danê ke ma bêveng bikerê.”

 

Qezaya Qilabanî ya Şirnexî de dewa Roboskî de 17 ci ra tutî, 34 kesî hetê Hêzê Çekdarî yê Tirkîya (TSK) ra ameyî qetilkerdiş. Qirkerdişî Roboskî ser o 13 serrî derbaz bî. Keyeyê kesê ke dinyaya xo bedelnayî, 13 serrî yo edalet gêrenê û waştişê muhakemekerdişêk adîlane kenê. 

 

Qirkerdişî ser o 13 serrî derbaz bî la Roboskî de her çî sey xo yo. Dayîka Serhat Encu (17) ke 34 kesê ke  Roboskî de ameyî qetilkerdiş kesêk o, Halîme Encu dîyar kerd ke pêwa 13 serrî derbaz bîyo zî edalet nêameyo. 

 

‘4 teyareyê şerî semedê 34 merdiman şirawitî’

 

Halîme Encu wina qisey kerd: “Serhat semedê debara keyeyê xo hewl dayîne. Qirkerdiş ra heta nika kezeba ma veşena. Gunayê tutanê ma çi bî? Lajê mi hema 17 serre bî. Di wayê û birayanê xo dayîne wendiş. Ewnîyayîne keyeyî ra. Her roje nêşîne. Reyan şîne. Varan de, zimistanî destê ey bîne cemed. Nêeşkayîne solanê xo vejo serdan ver.  Wijdanê înan çin o. Her reye şîne benzîn ra 300 TL qezenc kerdêne. 150 Tl dayîne wayê û birayanê xo.  Debara ma kerdêne. Çeka înan çinbî. Tena di bîdon benzîn estbî. Birayê ey yew muhendis o û yew zî mamoste yo. Çi heqê înan estbî ke merdiman qetil kenê. 4 teyareyî 34 merdiman ser o şirawitî. Xeylê xo tutî bî. 15-16 serreyî bî. Bi bombeyan bedenê înan parçe kerd. Ma parçeyê tutanê xo nêdî. Ma nas nêkerdêne. Tutê ma pêro bi benzîn helîyayî.”

 

‘Hewldayî ke bi tezmînatî serê hedîse padê’

 

Halîme Encu dîyar kerd ke badê qirkerdişî şîyê cayê hedîse û cilanê tutanê xo ra nas kerdê. Halîme Encu wina dewam kerd: “Badê hedîse ma dewa akerd. Dosya heta Ewropa şî. Yê ke nê qirkerdişî kerdî nêameyî muhakemekerdiş. La dewlete hewl da bi tezmînat serê hedîse pado. Lajê mi ame qetilkerdiş. Lajê ke mi semedê na hedîse ame tepiştiş. Dejê ma zî hêrsê ma zî pîl o. Tu sûcê tutanê ma çinbî. Wa şikdarî bêrê vînayîş, zerrîya ma rehet bibo.”

 

‘Şikdaran vejê werte’

 

Halîme Encu dîyar kerd ke dewlete hewl daya ke tazmînat bido înan û vat, înan qebûl nêkerdo û wina qedêna: “Badê hedîse ameyî vatî; ‘ma tazmînat û keye bidê şima’. Ma kesê ke qirkerdiş pê ardê, tezmînatê nêgînê. Hema yenê vanê bigîrê. La ma nêgînê. Ma wazenê ke şikdarî bêrê vînayîş. Badê lajê mi ez bi xeylêk nêweşîyan kewta. Çi sûcê lajê mi estbî?”