Elfazî Toral

 

STENBOL - Rojnamegeran dîyar kerd ke semedê nêheqîyê Tirkîya vejenê werte, yenê qetilkerdiş û vatî: “Ma rojnamegerê ke ewro hedef yenê girewtiş, her tewir hêrişî red kenê. Rojnamegerî suc nîya. Sucdar o yo ke rojnamegerîye hedef gêno. Ma do  têkoşînê rojnamegerê ke ameyê qetilkerdiş dewam bikerê.”

 

Rojnamegere Cîhan Bîlgîn û Nazim Daştan ke averşîyayîşê Vakur û Rojhelatê Sûrîye taqîb kerdêne, 19ê Kanûne de rayîrê mabêne Awbendê Tişrîn û Sirînî de bi SÎHAyî ameyî qetilkerdiş. Şofirê wesayîtî Ezîz Hec Bozan zî birîndar bî. Reaksîyonê hemverê  qetilkerdişê rojnamegeran her cayî de dewam kenê.

 

‘Ma do têkoşînê hevalanê xo dewam bikerê’

 

Rojnameger Dîlan Şîmşek da zanayîş ke hedefgirewtişê rojnamegeran heqê girewtişê agahîyan ê komelî keno tehluke û vat: “Hêrişê ke rojnamegeran hedef gênê, reyke bîn mojna ke meslegdarê ma bi çi bedelan heqîqetî vejenê werte.  Hedefgirewtişê rojnamegeran bi armancê vernîgirewtişê vengê şarî yo. Tena hawirê şerî de nê, bajaran de rojnamegerî tedayan vînenê, hêrişan vînenê. Ma her tewir hêrişan red kenê. Ma do têkoşînê hevalanê xo dewam bikerê.”

 

‘Semedê bêhuqûqî vetî werte ameyî qetilkerdiş’

 

Rojnameger Devrîm Findik zî dîyar kerd ke tedayê çapemenî ser o timî estbî û vat: “Demê taqîbkerdişê xeberan de bi desan kedkarê çapemenîya azade ameyî qetilkerdiş. Rojnamegerê bêhuqûqî, nêheqî vejenê werte, yenê qetilkerdiş. Tirkîya semedê çîyê ke kena, nêvejîyê meydan hevalanê ma qetil kena. La ma do raştîyan her tim binusê. Ma do tu wext fek nuştişê raştîyan ra vera nêdê.”

 

‘Hêrişî sûcê şerî yê’

 

Rojnameger Eylem Nazlier zî vat: “Yê ke heqîqet resnenê şarî, xebatkarê çapemenîya azade yê. Qetilkerdişê înan, hêrişêk hemverê çapemenîye yo û sûcê şerî yo. Ganî kiştoxî lezkî bêrê muhakemekerdiş. Ma Şîşhane de semedê yadkerdişê hevalanê xo ameyî têhet la polîsan hevalanê ma destbend kerdî. Ma nê şermezar kenê. Rojnamegerî sûc nîya. Çapemenîya azade nêeşkena bêro bêvengkerdiş. Têkoşînê ma do dewam bikero, ma bêveng nêmanenê.”