Rozerin Gultekîn-Elfazî Toral

 

STENBOL - Cinî derheqê qetilkerdişê, krîmînalîzekerdiş û tepiştişê rojnamegeran de qisey kerdî û dîyar kerdî ke pêwa pêro çîyan çapemenîya azade raştîyan vejeno werte û vengdayîşê têkoşînê hempar kerdî.

 

19ê Kanûne de rayîrê mabêne awbendê Tişrîn û bajarokê Sirîn de rojnamegere Cîhan Bîlgîn û Nazim Daştan ke xeberan taqîb kerdêne, hetê SÎHAyî yê aydê Tirkîya ra hedef ameyî girewtiş û qetilkerdiş.

 

Rojnamegeran û rêxistinê cinîyan derheqê tepiştiş û tedayê çapemenîya azade ser de ercnayîş kerdî.

 

‘Semedê raştîyan biniminê rojnamegeran krîmînalîze kenê'

 

Rojnameger Zeynep Kuray dîyar kerd semedo ke îqtîdar raştîyan binimino, rojnamegeran krîmînalîze keno û vat: “Wextê tewr zorî ke xeberî ameyîne taqîbkerdiş, mi Nazimî nas kerd. Mi qedexeyê vejîyayîşê teberî de Cizîr de vînabî. Ciwanêk rî huyaye bî. Mîyanê ê hovîtî de ma xeberan viraştêne. Semedo ke raştîyan binuso, canê xo dabî vernî û amebî uca. Ey xebera Dayîka Taybete viraşte. Semedo ke xebere viraşte, ame tepiştiş. Heta eşkenê wa raştî biniminê, tu wext raştî nimite nêmanenê. Do vejîyê werte.”

 

‘Ma venga sazgehê demokratîkan kenê’

 

Mûxabîra Gazeta Patîka Yadîgar Aygun zî vat: “Rojnamegerî wexto ke meslegê xo kenê her tim tehlukeyan dir yenê rî bi rî. Rojnamegerî karê xo ser yenê qetilkerdiş. No sûc o. Hevalê ma Fîlîstîn û Sûrîye de yenê qetilkerdiş. Ganî komel verê ma de ca bigîro. Ganî sazgehê demokratîkî verê ma de ca bigîrê. Ganî pîya têkoşînê xo dewam bikerê. Ganî ma tepiştişê rojnamegeran qebûl nêkerê. Ganî ma wayîrê heqê girewtişê xeberan vejîyê.”

 

‘Adetê çapemenîya azad tu wext nêqedêno’

 

Endama Komeleya Wextê Cinî Newroz Unverdî reaksîyon vera tedayan mojna û vat: “Hewl danê çapemenîya azade bêveng bikerê. Rojnamegere Cîhan Bîlgîn û Nazim Daştan ameyî qetilkerdiş. Eynî wextî de rojnamegerê ke nê protesto kerdî zî ameyî tepiştiş. No zî tabloyê Tirkîya mojneno. Çapemenîya azade tu wext bêveng nêmende. Oyo ke heqîqet resna verê destê ma çapemenîya azade bî. Coka ma wayîrê çapemenîya azade vejîyê.”

 

Endama Koordînasyona Yewîya Semedê Demokrasî (DÎB) Nesteren Davutoglu bale ant paştdayîşî ser û vat, tedayê rojnaemgeran ser û komelî ser bi armancê bêvengkerdişî yenê kerdiş û dîyar kerdî ke her kes wayîrê azadîya fikr û fehmî yo. Nesteren Davutoglu dewam de dîyar kerd ke hemverê nê tedayan de paştdayîş rayîro tewr bedew ê têkoşînî yo.