Derya Ren

 

RIHA- Endama Înîsîyatîfê Abdullah Ocalanî rê Azadî Eyşe Efendî, derheqê azadbîyayîşê Kobanê de ercnayîş kerd û da zanayîş ke şar bi ruhê xoverdayîşê Kobanê yê serra 2014ine de vejîyayo meydanan, Tişrîn de têkoşîn kenê û vat:” Paştdayîşê ma şar o. YPG, QSD yo, hêzê pawitişî yê.

 

Yew cinîya ke şahidîyê prosesê Kobanê kerd û xoverdayîşî de ca girewte, Endama Înîsiyatîfê Abdullah Ocalanî rê Azadî Eyşe Efendî ya. Eyşe Efendî derheqê prosesî de û xoverdayîşê tarîxî yê nika Tişrîn de yeno dayîş de qisey kerd.

 

‘Tişrîn cayê xoverdayîşî yo’

 

Eyşe Efendî da zanayîş ke şero ke Vakur û Rojhelatê Sûrîye de yeno ciwîyayîş, şerê bîyayîş û çinbîyayîşî yo û wina vat: “Şero ke nika yeno kerdiş, xeylêk bi şîdet û xof o. Bi serran o hemverê Kobanê de hêrişê bêmabênî est ê. Rewşa şerê serra 2014ine de ame ciwîyayîş, ewro zî ancî yo. Şerê Kobanê de çar parçeyê Kurdistanî tewr bî û seferberî ameye îlankerdiş. Eynî wextî de xeylê kesê xerîbî zî tewrê   seferberî bîyî û şehîd bîyî. Senî ke ewro xoverdayîşê serra 2014ine ame dayîş, ewro zî şehîdî nê prosesî de yenê dayîş. Ewro Tişrîn cayê xoverdayîşî yo.  Emîrê DAIŞ'î vano, kurdêk ça de bibo, ez o hêriş bikerî. Ma zî vanê: Heta ke ma bibê, ma do xoverdayîşê xo dewam bikerê.”

 

Xoverdayîşê şarî

 

Eyşe Efendî dewam de wina vat: “Uca de 5 sivîlî ameyî qetilkerdiş û bi desan zî birîndar bîyî. Şarê ucayî hema zî hemverê pêro hêrişan xoverdayîşêk pîl keno. Wexto ke hêrişê Efrînî ser ame destpêkerdiş, şarî uca de xo ver da û nobete girewt. Senî ke Şehîd Zehra vat; 'ma mergî ra berzêr ê’. Ma zî vanê; Rojawan nêkeweno, ma mergî ra pîlêr ê. Hêzê mîyanneteweyî zî bêveng ê. Heto bîn ra hêzê mîyanneteweyî yê ke tîya hemverê hêrişan de çîyêk nêkenê. Binê ala înan de hêriş pê yenê. Xoverdayîşê hemverê nê wayîrê manayêkê pîl o.”

 

Silamkerdişê xoverdayîşê Îmraliyî 

 

Eyşe Efendî dayîkê ke sînor de xo ver danê silam kerd û vat: “Xoverdayîşê 2014ine de sînorê Kobanê de ame dayîş zaf bierc bi. Ewro zî nobete sînor de ameya destpêkerdiş. No xeylêk muhîm o la qîm nêkeno. Ganî tewrbîyayîş hîna zêde bibo. Ma xoverdayîşê zindanan yê moral danê ma, silam kenê. Ma xoverdayîşê Rayber Apo yê Îmraliyî silam kenê.”

 

‘Paştdayîşê ma yê şarî, YPG û QSD yo’

 

Eyşe Efendî tewr peyîn wina vat: “Şarê kurdî senî 2014ine de paştdayîşê leşkerî semedê Kobanê kerd, do ewro zî bikero. Bi gonîya şehîdan 2014ine de sînorî ameyî wedaritiş. Dayîkê şehîdan yewîye awan kerdî. Her çar parçeyî de yewîye awan kerdî. Pêro kesê ke xo ra vanê ma demokrat ê, ganî hemverê hêrişan de bêveng nêmanê. Ma paştdayîşê xo şarê xo, YPG, QSD û hêzê pawitişî ra gênê. Ez pêro wareyê xoverdayîşî silam kena. Hêvîdar a Rayber Apo ra mijdanîyêk bo. Xoverdayîş cuyayîş o. Şehidî nêmirenê.”