Neslîhan Kardaş 

 

WAN - Cinîyan Sûka Pîlî ya Şarî ya Wanî de şuxilênê, dîyar kerdî ke semedê krîzê ekonomî şîyayeyî zêde bîyê, karê înan zehmet kerdo. Cinîyan rewşa bîyaye ser o wina vatî; "Semedo ke her hewte vayî bena, ma rotiş de zehmetîyan ancenê. Vayîya berardeyan her tim vuryena û na rewşe hem ma û hem zî girewtoxanê ma kena tengasî. Problemê ma  krîza ekonomî yê, labelê ganî ma debara xo bikerê" 

 

Krîzê ekonomî roj bi roje kûr beno û tewr zêde cinî nê krîzî ra tesîr benê. Cinîyê ke Sûka Pîlî ya Şarî ya Wanî de şuxilênê, tena bi krîzê ekonomî nê, bi zextê  komelî û şert û mercê negatîfî yê xebate dir zî têkoşîn kenê. Pêwa ke xeylê xo bi meaşêk kêm şuxilênê, serdbîyayîşê cayî zî cuya înan hîna xidar keno.

 

'Vayîya berardişan her hewte zêde benê'

 

Rojîn Ocek, dîyar kerd kargeho ke ci de şuxilêna aîdî keyeyê aye yo û vat: “Ez mektebê mîyanên û nata ra ge-ge yena û şuxilêna. Bi hîrê serrî peyîno ke dewamî tîyaya. Potansîyelê karsazîyê ma goreyê serranê verê zaf xirab o. Her hewte vayîya berardişan est o û na rewşe xeylêk zextan ma rê kenê. Nê semedî ra ma nêeşkenê biroşê. Semedo ke sîstemê germkerdişî çin o karê ma zimistanî hîna xidar beno. Reyan ma nêeşkenê çenteyêk plastîk zî bikerê destê xo. Ganî êdî vayî zêde nêbê. Her kes zehmetî anceno. Bûtçe qîm nêkenê."

 

'Ekonomî bi rastî xirab a'

 

Zehra Polat ke 6 serrî yo Sûka Şarî ya Pîlî de dikanê çayxaneyêk de şuxilêna, dîyar kerd ke bi taybetî girewtoxan dir xeylêk rey problemê ma virazênê. Zehra Polat, wina vat: “Ma nêeşkenê debara xo bikerê. Hema hema her keso ke Wan de şuxilêno, binê meaşo tewr kêmî de şuxilênê. Nê demê peyîn de mi girewtoxê xo dir vayîye ser o munaqeşe kerdêne. Bi no hawa, ma nêeşkenê berardiş biroşê. Ekonomî raştî xirab a. Kes çîyêk nêgîno. Ez na babete de girewtoxan fam kena, la ma sey esnafî mabêne de yê. Girewtoxî zêdebîyayîşê vayîya ma ra xeylêk gazincan kenê."

 

'Sebebo tewr pîl problemê ekonomî yê’

 

Dîdem Çetîner zî 5 aşmî yo şuxilêna wina vat: “Hetê ekonomî ra rojê mi xeylêk zehmet derbaz benê. Mêrdan ra hîna zêde lazimîya ma est a. Meaşo ke  ez gêna, qîm nêkeno la ma hewl danê ke bi hawayêk debara xo bikerê. Çîyo raştî ganî ez debara xo bikerî. Xeylê girewtoxê ke yenê tîya, yenê vayîyan danê têver û ma nê wareyî de probleman ciwîyenê. Sebebo tewr pîl yê probleman, ekonomî yo. Wexto ke girewtox dest veng agêreno, ma zî tesîr benê. Semedo ke ma serê sibayî ra heta şan de tîya yê.”