Melîke Aydin

 

İZMİR - Pêwa ke sebebê vejîyayîşê kuçeyan ke xeylê xo ciwanan ra pê yeno, sey krîzê ekonomî, îlankerdişê serra keyeyî bêameyox yeno binamekerdiş zî çalakîkeran dîyar kerdî ke sebebê rastî waştişê komelêk demokratîk o.

 

19ê Adare û nata badê ke Şaredarê Bajarê pîlî yê Stenbolî Ekrem Îmamoglû ame destbendkerdiş û tepiştiş, kuçeyan de hem hemverê qeyûman û hem zî hemverê caardişê nêbîyayîşê demokrasî çalakî yenê organîzekerdiş. Çalakîkerê ke xeylê xo ciwan ê, sebebê vejîyayîşê kuçeyan nêbîyayîşê ameyoxî, krîzê ekonomî û îlankerdişê serra keyeyî hetê hukmatî biname kenê û sebebê sereyîn zî waştişê komelêk demokratîk mojnenê.

 

‘Wendekaran dî ke eşkenê şewêke de dîplomayê înan bêrê betalkerdiş’

 

Her çend ke çalakî, badê tepiştişê Ekrem Îmamoglû dest pêkerdibî zî, Sena Tekîn a Pîrebokê Kampusî ra ya dîyar kerd ke hêrsê şarî kewt pêser û va: "Rojê destpêkî de xeylê wendekaran vatêne ke înan dî ke dîplomeyê ke gênê eşkenê şewêke de bêrê betalkerdiş. Nika wendekarî unîversîte ra wazenê ke semedê wendekarû tepişteyî çareserîyêk semedê îmtîhanî bêro vînayîş."

 

'Hemverê îlankerdişê serra keyeyî reaksîyonî ameyî mojnayîş'

 

Sena Tekîn dîyar kerd ke cinîyê ciwanî semedê îlankerdişê serra keyeyî ke zextê cuya cinîyan ser û caardişê hemverê cinîyan vejîyayî meydanan û va, "Cinîyê ke destbendkerdiş de ameyî tacîzkerdiş, vînayî ke dewlete çiqasî bi zîhniyetê camêrdî têgêrena. Xeylêk waştişê ciwanan yê sey unîversîteya azade û cuyêka demokratîke bî la waştişê înan ê sereyîn zî demokrasî bî."

 

'Sebebê bingehîn ekonomî yo'

 

Wendekara unîversîte Rûya Zeynep Altikizlar, diyar kerd ke tepiştişê Ekrem Îmamoglûyî dir dest bi çalakîyan ameyo kerdiş, la no sebebê bingehîn nîyo, la derbeyê peyîn o û Ruya Zeynep Altikizlar va, "Bi ewnîyayîşê mi sebebê sereyîn ke xeylê xo ma ameyî tîya tengîyê ekonomî yê. Ez wendekar bîya, par mi fek wendişî ra vera da. Semedo ke îmkanê mi çinbî.”

 

‘Ma hemverê bêhuqûqî teber de yê’

 

Endama TÎP'î Pinar Alp zî dîyar kerd ke a terefgirê sîstemêk huqûqî ke her kes şert û mercê têduştî de yê û wina va: "Parlamentera ma ya Hatayî zî bi hawayêk bêqanûnî zîndan de ya. Komê tîya aîdê tu  partî nîyê. Ma venga her kesî kenê, partîya îqtîdar û partîya mûxalefetî ya sereyîn CHP’yî ra wazenê ke heqê şaran bipawê. Nê semedî ra ma wazenê pêro sîyasetmedarî bi nê rengî têbigêrê, wexto ke ma yew bê, no mojneno ke ma çiqasî bi hêz ê.”

 

‘Ma hemverê qeyûman de kuçeyan de yê’

 

Wendekara unîversîta Ronî Ceylan zî va, "Ma sey wendekarê unîversîte, semedê pawitişê pêro heqan kuçeyan de yê.” Ronî Ceylan dewam de wina va, "Ma semedê pawitişê heqê pêro şaran tîya yê. Ma do hem bi boykotê hemverê ekonomî, hem zî bi çalakîyan xo ver bidê. Ma do heqanê xo bipawê. Ma  qeyûmê tayînî şaredariyan û qeyûmê tayînkerdişî yê unîversîteyan ra vanê nê.”