Derya Ren

 

MERKEZÊ XEBERAN - Hemsereka TEV-DEMî Remzîye Mihemed derheqê qerarê weçînitişî yê hukmatê demkî ya Şamî de va: "Weçînitişan ra dima, se ra 70ê kursîyanê ke weçînitişan de nêameyî girewtene do bêrê tayînkerdene. Nê tayînkerdişî nêşênê şarê Sûrîye temsîl bikerê. Do demokratîk nêbê."

 

Pêwa ke hukmatê demkî yê Şamî ke dima rijnayîşê rejîmê Baasî ameye ronayene derheqê pêkewtişan û kaosê Sûrîye de tu gamî nêerzeno, raporê pêroyî mojnenê ke leşkerî bi cilanê hukmatê demkî û kesê ke amblemê DAÎŞî xo ser o kerdî, xeylêk qirkerdişê hemverê elewî û durzîyan de beşdar bîyî. Pêwa ke nê pêroyî welat de qewimîyenê, herinda ke rewşî hal bikero, hukmatê demkî yê Şamî neql kerd ke do mabênê 15-20ê êlula 2025 de weçînitişanê parlamentoyî virazno.

 

Hemsereka Têgêrayîşê Komelê Demokratîke (TEV-DEM) Remzîye Mihemed derheqê mesele de ajansê ma JINNEWSî rê qisey kerde.

 

'Hukmatê demkî xo sey daîmî vîneno'

 

Remzîye Mihemed, awanbîyayîşê hukmatê demkî yê Şamî ra dima rijnayîşê rejîmê Baasî arde xo vîr û dîyar kerd ke hukmatê demkî xo sey daîmî vîneno, labelê pratîk de wina nîyo û wina va: "Hukmatê demkî yê Şamî nika seba weçînitişan hazirîyan keno, labelê rayîrê kesanê cîyayan vernî de asteng viraştena ke beşdarê nê weçînitişan bibê. Hukmat bi hewayêko cîya nê cîyayîyan vîneno û ma her roje bi qirkerdişê newîye rastê yenê. Ma nêşênê vajê Sûrîye de ciwîyayîşêko normal ameyo awankerdene. Hukmatê demkî yê ke ameye awankerdene xo sey daîmî vîneno û seba nê amancî dest bi xebate kerdo."

 

'Seba şarî demokratîk nîyo'

 

Remzîye Mihemed, qetî kerd ke Bakur û Rojhelatê Sûrîye şorişî ra ver bi hewayêko demokratîk yeno îdarekerdene û wina qisey kerde: "Şar mîyanê nê sîstemê ronabîyayîye de wayîrê awanîyêk o ke şêno xo temsîl bikero. Cinî û ciwanî mîyanê nê sîstemî de rayberî kenê. Sîstemê Rayberîya Xoserî ya ronabîyayîye pêro cîyayîyan gêna xo mîyan û temsîlîyetê xo mojneno. Pêwa ke sîstemê demokratîke mintiqayanê binê kontrolê Rayberîya Xoser de wina baş bica nêaro zî, qerarê ke hetê hukmatê demkî yê Şamî ra ameyo girewtene seba şarî do balkêş nêbo û do demokratîk nêbo."

 

'Nê tayînkerdişî temsîlîyetê şarê Sûrîye nîyê'

 

Remzîye Mihemed, arde xo vîr ke qerarê weçînitişî xeylêk herêman teber verdanê û dîyar kerd ke weçînitişêk ke pêro sûrîyeyijan teber verdano, do demokrasî û azadîye şarî nêyaro û wina fikrê xo ardî ziwan: "Weçînitişan ra dima se ra 70ê kursîyan seba herêmanê ke weçînitişan de nêameyî weçînitene do bêrê tayînkerdene. Nê tayînkerdişî nêşênê gelê Sûrîye temsîl bikerê. Seba naye, kesê tayînbîyayeyî do eynî zîhnîyeta hukmatê demkî yê Şamî bibê."

 

'Ganî zext hukmatê demkî yê Şamî ser o bikerê'

 

Remzîye Mihemed sewbîna va ganî rêxistinê girseyî yê demokratîkî yê mîyanneteweyî vera qeraranê ke hetê hukmatê demkî yê Şamî ra ameyî girewtene reaksîyon mojnê û wina qiseya xo qedênaye: "Şarê Sûrîye têkoşînêk girse keno. Wexto ke ma Bakur û Rojhelatê Sûrîye vînenê, ma şênê vajê awanîyêka demokratîke vejîyaye meydan. Seba naye, şarê Suweyde zî rêxistina xo awan kerdo. Eynî dem de, peymana ke 10ê adare de mabênê QSD û hukmatê demkî yê Şamî de ameye îmzakerdene hema nêkewtaye merîyet. No ereymendiş her roje beno sebebê krîzanê newîyan. Seba naye, ganî hêzê mîyanneteweyî hukmatê demkî yê Şamî ser o zext bikerê ke peyman bica bîyaro."