Memîhan Zeydan

 

MÛŞ - Gulay Bîngol dîyar kerd ke xelasîya şaran bi têkoşînê aştîya ke hetê cinîyan ra yena îdarekerdene şêna pêk bîyaro û va: "Bîrêz Ocalan naye dî. Eke cinî beşdarê aştîye bibê, aştî do bi ser bikewo."

 

Prosesê aştîye, bi "Vengdayîşê Aştî û Komelê Demokratîke" ya Rayberê Şarê Kurdî Abdullah Ocalanî 27ê Sibate de dest pêkerd û hetê Têgêrayîşê Azadîye ra gamanê erênî ameyî eştene. Na çarçewa de "Komîsyonê Yewgirewtişê Neteweyî, Waye-Birayî û Demokrasîye" ameye ronayene. Labelê, komîsyon, ke hewt kombîyayîşî qedênayî, waştişan bica nêardo, eynî dem de Abdullah Ocalanî reyde zî kom nêbi, no bî sebebê nakokîyan. Pêwa ke yeno vatene komîsyon seba eştişê gamanê qanûnî û edlîyeyî seba azadîya girewtoxan, bi taybetî nexweşan, qanûnî hazir keno zî, israrê aştî û demokrasî dewam keno.

 

Gulay Bîngol, îdarekara rêxistina bajarokê Mûşî ya Partîya Têduştî û Demokrasî (DEM Partî), derheqê prosesî de ercnayîş kerd.

 

'Pêlê tepiştişan welat 50 serrî peyser berd'

 

Gulay Bîngol, dîyar kerd ke Tirkîya hewcedarê ciwîyayîşê azad ê şaran û aştîyêka mayinde ya û va: "Rewşa Rojhelatê Mîyanênî baş yena zanayene. Her ca de şer est o. Dima ke şerê 52 serran qedîya, ma nêwazenê Tirkîya bikewo şerêko bîn. Eke welatêk de demokrasî bibo, eke mabênê şaran de ciwîyayîşê azad bibo, o wext serekê partîyanê sîyasîyan ganî zindanan de nêbê. No bi xo bêtêduştî yo, problemêk demokrasî yo. Ma bi serran o cehd kenê naye raya pêroyîne û îdareyê newî rê îzah bikerê. Pêlê tepiştişan ke bi Partîya Demokratîke ya Şaran (HDP) dest pêkerde, ewro bi CHPyî zî dewam keno. No pêlê tepişteşan welatî 50 serrî peyser berd."

 

'Heqê tepişteyanê nêweşan yeno binpêkerdiş'

 

Gulay Bîngol sewbîna bale ante ser krîzê ekonomî yê kûrî û bale ante ser zehmetîyanê ekonomî yê şarî. Gulay Bîngol va: "Sey ke no bes nîyo, ewro bi hezaran girewtoxê nêweşî zindanan de yê. Heqê înan zî est o û yenê binpêkerdene. Heta ke heqê înan nêrê caardiş, heta ke serekê partîyanê sîyasîyan, îradeyê şarî zindanan de bê, komîsyon nêşêno îddîa bikero ke edaletî awan keno. Tayê hemşaredarê ke hetê şarî ra ameyî weçînitene zindanan de yê, tayê bînî zî wezîfe ra ameyî dûrvistiş. Ma bi temamî vera nê destêserkerdişê qeyûman û xespkerdişê îradeyê şarî yê."

 

'PKK wezîfeyê xo ano ca'

 

Gulay Bîngol merasîmê veşnayîşê çekanê PKKyî arde xo vîr ke hetê Rayberê Şarê Kurdî Abdullah Ocalanî ra ameyo waştene, û va: "PKK wezîfeyê xo ano ca û çekê xo veşna. Seba helkerdişê rewşe, gamanê girdî eşt. Nika dem ameyo ke hukmat game bierzo. Eke sendîkayêka azad bêro ronayene, ganî verê zindanî bêrê veradayene. Bi taybetî tepişteyê sîyasî ganî veradayê. Ganî vernî seba azadkerdişê kesanê ke seba bawerîyanê xo girewteyî yê bêro dayene, seba azadkerdişê kiştoxan û tecawizkeran nê. Çîyê ke ê sey îradeyê şarî vînenê ganî veradayo. Bi seyan sîyasetkarê kurdî nika teber welatî, surgûn de ciwîyenê. Ganî rayîrêk înan rê bêro akerdene. Seba demokrasî ganî şûrê ke ser partîyanê sîyasîyan yeno antene wedarîyo."

 

'No şansê peyên ê Tirkîya yo'

 

Gulay Bîngol, dîyar kerd ke tena seba ke a îdarekara partîyêke ya, ceza yena waştene û va: "Bi hezaran hevalê mi, sey mi, Dadgeha Berz a Îstînafî de dewa û cezayê înan est ê. Ganî nê bêrê betalkerdene. Ganî serdestîya huqûqî bêro pawitene. No pabebîyayîşê ma yê sereke komîsyonî ra yo. Şar nê prosesê aştîye  ra paweyê zaf girdî est ê. Ez hêvî kena ke gamanê lazimî bêrê eştene û hukmat nêbo qurbanê naye. Ez hêvî kena ke rewşe sey prosesanê verênan nêvurîyo. No şansê peyên ê Tirkîya yo. Bêrê ma aştîyêka bi rûmet dîyarî bikerê nesilê ameyoxan rê. Ganî pêro rêxistinê komelê sîvîlî, partîyê sîyasî, sazî û rêxistinî her çîyê ke destê înan ra yeno bikerê ke naye dest bîyarê."

 

‘Aştî do bi ser bikewo'

 

Gulay Bîngol, behsê rolê Rayberê Şarê Kurdî Abdullah Ocalanî yê nê prosesî de kerde û va: "Ma endamanê AKPyî ra zî eşnawit ke Bîrêz Abdullah Ocalan rayberê dinya yo. Rayber Apo tena kurdan rê nê, şaranê Rojhelatê Mîyanênî rê zî azadîye ano. Ganî şert û mercî seba azadîya şaran başêr bikerê. Bîrêz Ocalanî cinî ardî merkezê têkoşînî. Dinyaya ewroyîne de, aştî bêyî beşdarîya cinîyan aştîyêka yewhetî ya. Rayber Apo zî naye dî. Eke cinî aştîye de beşdar bibê, aştî do bi ser bikewo. Rizgarîya şarî bi têkoşînê aştîye ya ke binê serkêşîya cinîyan averşona, pê yena."