Gulistan Gulmuş

 

AMED - Dîlan Şeveş derheqê 20ê tebaxe, Komîsyon de Dayîkanê Aştîye qiseykerdişê kurdkî astengkerdişî ser o qisey kerde û va: "Eke bîyayîş, ziwan û kulturê şarê kurdî bêro qebulkerdene, do samîmîyet bêro dîyene û girêdayeyê naye ganî qanûnî bivurîyê." 

 

'Komîsyonê Yewgirewtişê Neteweyî, Waye-Birayî û Demokrasî' ke TBMMî de awan bîye, 20ê tebaxe de reya 5ine kom bî. No kombîyayîş ke 4 saetî û nîm dewam kerde de na rey Dayîkê Aştîye, Dayîkê Şemeyî û Temsîlkarê Rêxistinanê Heqanê Însanan ameyî goşdarkerdene. Dayîkê Aştîye waştî kurdkî qisey bikerê labelê serokê komîsyonî Numan Kurtulmuş destûr nêda. Pêwa parlamenteran pêşnîyaz kerd ke tercume bibo. Dayîkanê Aştîye nêşîyayî bi ziwanê xo xo îfade bikerê. 

 

No astengî hetê xeylêk sazgehan, dezgehan û partîyan ra ame rexnekerdene û reaksîyon ameyo mojnayene. Komeleya Cigêrayîşê Ziwan û Kulturî ya Mezopotamya (MED-DER) zî reaksîyon mojnaye.

 

Mamosteya MED-DER’î Dîlan Şeveş derheqê astengkerdişê qiseykerdişê bi kurdkî de qisey kerd.

 

‘Înkarê ziwan û kulturê kurdî est o’

 

Mamosteya MED-DERî Dîlan Şeveş bale ante ser proseso ke dimayê vengdayîşê 'Aştî û komelê demokratîkî' yê Rayberê Şarê Kurdî Abdullah Ocalanî dest pêkerdo û va: "Prosesêk dest pêkerd. Têkoşînêk ke şarê kurdî 50 serrî yo keno est o. Netîceya têkoşînê Bîrêz Ocalanî de ma resayî netîceyêk û bi serkêşîya ey no proses dest pêkerd. Prosesêk wina de muzakereyêk di hetî dest pêkerd. PKKyî çekî veşnayî. Naye ra dima Dayîkanê Aştîye komîsyon de ca girewtî. Dayîkî bi laçikê spîyî beşdar bîyî. Labelê ziwanê înan ameyo astengkerdene. No pêro kurdan rê ameyo kerdene. Wazenê ziwanê kurdan asteng bikerê. Ma na nêzdîbîyayîşî şermezar kenê û qebul nêkenê."

 

'Ganî statû bêro dayene'

 

Dîlan Şeveş dîyar kerd ke seba proses weş derbaz bo, ganî dewlete samîmî bo û wina veng da: "Aştî yewhetî ra nêbena. Ganî her di hetî gaman de samîmî bê. Eke samîmîyet bibo do roşnayî bibo. Eke bîyayîşê şarê kurdî, ziwan û nasnameyê kurdan bêro qebulkerdene, samîmîyet bibo girêdayeyê naye qanûnî zî do bivurîyê. Ganî her kes wayîrê heqan bibê ke aştî pê bêro. Ma veng danê, ganî no otoasîmîlasyon vindero. Ganî statû bêro dayene. Ganî heqê perwerdeyî bi ziwanî bêro dayene."