Evîn Çîftçî

 

STENBOL - Endama Meclîsa Cinîyan a DEM Partî ya Stenbole Meryem Şaîr va, sebebê zêdebîyayîşê qetlîyamanê cinîyan polîtîkayanê dewletî yê û va: "Ma do vera nê polîtîkayanê sîyasîyan de têkoşîn bikerê." 

 

Cinî bi serran o vera zîhnîyeta serdest ê camêrdan de têkoşîn kenê. Cinî seba ke ciwîyayîşê xo dewam bikerê têkoşîn kenê û selahîyetdarî vera nê têkoşînî qanûnanê estbîyayeyan nêanê ca û bi polîtîkayanê bêcezayîye gumanbaran xurt kenê. Cinî vera nê polîtîkayan her wareyî de xo rêxistin kenê û têkoşîn kenê.

 

Polîtîkayanê bêcezayîye cesaretî dano gumanbaran

 

Meryem Şaîr qiseyê xo de va qetlîyamanê cinîyan roj bi roje zêde benê û no netîceya polîtîkaya dewletî de pê yeno. Meryem Şaîr wina dewam kerde: "Polîtîkayanê bêcezayîye cesaretî dano gumanbaran. No proses de qetlîyamanê cinîyan dewam keno û dewlete hetê bicaardişê qanûnan de, raştkerdişê qanûnan de tu çî nêkena. No bi pêroyî seba hepskerdişê cinîyan ê keyeyî yo û wazenê cinî tena bi rolê dayîkîye sînorkerde bibê. Gumanbarê ke cinîyan qetil kenê dadgehan de ceza yena kêmkerdene."

 

‘Dîn şuxilnenê û tedayan zêde kenê’

 

Meryem Şaîr dewamê qiseyê xo de dîyar kerd ke dîyanet derheqê cinîyan de fetwa dano û bi armancê îstîsmarkerdişê bawerîya kesan, zextan ser cinîyan zêde keno. Meryem Şaîr wina erjna: "Serra keyeyî mojnena ke qetlîyamanê cinîyan zêde benê û pêwa naye camêrdî bêceza manê. No mojneno ke dewlete cinîye nê, keyeyî pawena. Serra keyeyî de tu wext piştî cinîyan nêdaya. Fetwayanê dîyanetî de ma vînenê. Dîyanet bawerîye îstîsmar keno û zextan zêde keno. Ma cinî naye qebul nêkenê. Na polîtîkayêka bi zanebîyayîş a." 

 

'Prosesê aştîye bi cinîyan xurt beno'

 

Meryem Şaîr dîyar kerd ke prosesê aştîye bi cinîyan şêno xurt bibo û wina qedêna: "Têkoşînê ma do dewam bikero. Kirdeyê Aştî û Komelê Demokratîkî cinî yê. Ma sey rêxistinbîyayîşê cinîyan na hişmendîye de yê, zanenê ke seba averşîyayîşê prosesî ganî vernî qetlîyamanê cinîyan vernî bêro girewtene û no zî bi xurtbîyayîşê sazgehan û rêxistinanê cinîyan mumkin o. Na mesele de çîyê ke bêro kerdene o yo ke komîsyon, sazgeyê femînîstî yê cinîyan, rêxistinanê cinîyan goşdar bikero û fikir û erjnayîş înan ra bigîro. Ma cinî vera nê polîtîkayan têkoşîn kenê. Ma na hişmendîye de yê."