Rozerîn Gultekîn

 

STENBOL - Parlamentera DEM Partî Ozgul Sakî serê muhîmîya ke cinî awankerdişê aştîye de bibê aktorê sîyasî qisey kerd û va: "Ganî ma vengê cinîyan berz bikerê û dîyar bikerê ke çira aştî wazenê. Ganî ma bi rêxistinbîyayîşêk pîl zext îqtîdarî rê bikerê." 

 

Proseso ke bi "Vengdayîşê Aştî û Komelê Demokratîkî" yê Rayberê Şarê Kurdî Abdullah Ocalanî 27ê Sibate de dest pêkerd, bi qerarê rijnayîşê PKK'yî dewam kerd. Dima ra, Komîsyonê Destekdayîşê Neteweyî, Wayê-Biratî û Demokrasî parlemento de ame awankerdiş.

 

Parlamentera Partîya Têduştî û Demokrasî (DEM Partî) Ozgul Sakî, derheqê prosesî de qisey kerd.  

 

Ozgul Sakî bale ant serê averşîyayîşê peyîn û wina va: "No proses semedê çareserîyêk têduştî, demokratîk û aştiyane ya meseleya kurdî dest pêkerd, la çareserî do rasterast tesîrê pêro beşê komelî keno. Sey Meclîsê Cinîyan ê DEM Partî, femînîst û Têgêrayîşê Cinîyanê Kurdan (TJA), ma dîyar kerd ke ma muhîmîyêk pîl danê komîsyon. Cinî nîmeyê komelî pê anê û pêro netîceyê negatîfî yê polîtîkayê şerî tesîr benê. 27ê Sibate ra nata cinîyan xo newe ra birêxistin kerdê."

 

Ozgul Sakî, wina bale ant serê têkoşînê cinîyan: "Ê vanê ke cinî awankerdişê komelêk demokratîk de xeylêk çî est ê bikerê û ê amade yê. Ganî ma vengê cinîyan pîl bikerê û dîyar bikerê ke ê çira aştî wazenê? Semedê cewabê persê sey; çira cinîya ke kargehêk de şuxilêna hewceyê aştîye ya? Çira dewijê ke semedê madenî Deryayê Sîya ra ameyê vetiş hewceyê aştîye yê? Ganî ma bi rêxistinêk hîra zext îqtîdarî rê bikerê. Xeylêk çîyê bînî est ê ke ganî  game bi game bêrê kerdiş."

 

Ozgul Sakî wina peynî kerd: "Yew persa tewr muhîm na ya; gelo nê pêroyî eşkenê bi nê hukmatî bêrê bidestkerdiş? Çar hetê dinya nimûneyê tewir bi tewir yê nê qonaxan est o, dayîşûgirewtiş, têkoşîn, aştî û çareserî. Her yew nînan de, no dayîşûgirewtiş bi rengêk têduşt yeno kerdiş. No proses ci de welatan, hukmatan vurnenê û hukmatî polîtîkayê xo vurnenê. No bi tenê verdayîşê waştişê komîteyan, parlamentoyî, yan sîyasetê temsîlkarî rê nêvirazîya yo."