STENBOL - Cinîyê ke tewrê rayîrşîyayîşê “Gamêke semedê aştîye” û bernameyê Roşanê Ziwanê Kurdkî bîyî, dîyar kerdî ke ganî bi îradeyê Abdullah Ocalanî prosesê aştîye bi gamanê somutî aver şêro û venga statuyî kerdî.

 

Vengdayîşê “Aştî û Cimatê Demokratîkî” ke Rayberê Şarê Kurdî Abdullah Ocalanî 27ê Sibate de kerdbi, serrêke zêde ser o vîyart labelê pêwa nê zî gamê qanûnî nêameyî eştiş. Stenbol de bi rayîrşîyayîşê ‘Gamêke semedê aştîye’ bernameyê Roşanê Ziwanê Kurdkî ame caardiş. Cinîyê ke tewrê rayîrşîyayîşî bîyî dîyar kerdî ke ganî tecrîdê serê Abdullah Ocalanî bêro şikitiş, gamê somutî bêrê eştiş û heqê perwerdeyî yê bi ziwanê dayîke bêro naskerdiş.

 

‘Cuyêka azade’

 

Çîgdem Ermîşe da zanayîş ke endîşe û hêvîya înan a prosesî, awankerdişê şert û mercanê cuyêka azade û demokratîke yo û wina va: "Vanê proses est o labelê wexto ke ma vejîyenê wareyan, ma rê cigêrayîş kenê. Ma nêşenê cil û berganê xo bi rehetî xo pay bikerê. Ganî tepîşteyî serbest bêrê veradayîş. Ganî kurdî azad bîciwîyê."

 

‘Polîtîkayê pelçiqnayîşî bica anê’

 

Elîf Çagan Durmaze dîqet ant serê ablûqakerdişê polîsan û wina ard ziwan: "Wextê winasî de şarî ra zafêr polîsî estbîyî. Tirkîya polîtîkayê xo yê pelçiqnayîşî domnena. Ganî gamê somut bêrê eştiş."

 

‘Ganî Heqê Hêvî bêro caardiş’

 

Dîlan Demîre zî eşkera kerd ke ganî cinîyî heme wareyan de estbê û wina qisey kerd: "Ewro her ca bi barîkatan girewte yo. Bernameyê roşanê ziwanî yo. Behsê prosesê aştîye kenê. Ganî nê caardişî çin bê. Ganî semedê Abdullah Ocalanî 'Heqê Hêvî' bêro naskerdiş."

 

Heqê perwerdeyî yê bi ziwanê dayîke

 

Avesta Yalgî zî destnîşan kerd ke cinîyî seba Rayberê Şarê Kurdî û heme tepîşteyan aştî û edalet wazenê û va ganî lezkî heqê perwerdeyî yê bi ziwanê dayîke bikewo mîyanê cuye.

 

Hejar Yalgî zî dîqet ant serê polîtîkayanê şerî yê serê şarî û va ke nêzdîbîyayîşê îqtîdarî yê hemverê kurdan goreyê prosesî şekil gêno. Hejar Yalgî eşkera kerd ke vatişî est ê labelê çalakî çin a.

 

Dayîka Aştîye Ayten Toprake vengdayîşê îqtîdarî kerd ke ganî game bêra eştiş û va şar seba azadîya Abdullah Ocalanî wareyan de yo.

 

Aynur Erole ard ziwan ke waştişê înan o esas azadîya tepîşteyanê sîyasîyan, heqê perwerdeyî yê bi ziwanê dayîke û azadîya seba kurdkî ya.