Sema Çaglak

 

AMED - Cesaretê Zelîha Ozkul xo dir serkewtiş zî ard. Zelîhaya ke nika dikanê tantunî dana xebitnayîş, dîyar kerd ke semedê karê keyeyî têkiliyê aye teberî rê visyabi û vat: "Ez veng dana cinîyan û vana pey xeyalanê xo şêrê û şima do qetî serbikewê."

 

Serkewtişê cinîyan rayîrê cinîyê bînan akeno û yewbînan ra cesaret gênê. Cesareto ke vila beno serkewtiş zî xo dir ano. Nînan ra yew zî Zelîha Ozkul (48) a û bi viraştişê tantunî debara xo kenaç Zelîha ke bi serran o tena karê keyeyî dir eleqedar bîya, nika zî dikanê xo yê  tantunî akerda û cesaret dana xeylêk cinîyê derûdorê xo.

 

‘Mi waştişê xo bi ca ard'

 

Zelîha dîyar kerd ke emngêke verê dest bi karê tantunî kerda û wina vat: "Ez her wext şîne Mersîn û ameyîne. Cîranêke mi uca de karê tantunî kerdêne. Ez xeylêk rey şîne verê ci û mi hetkarî dayîne ci. Bi nê şiklî viraştişê tantunî musaya. Dimayê ke ameya Amed, mi qerar da ke ez nê karî bikerî. Mi ra vatî, emrê to pîl o, ti nêeşkena serbikewê. Labelê ez pey waştişê xo şîya. Ez viraştişê werdî xeylêk hes kena. Werdê mi hetê xeylêk kesan ra yenê ecibnayîş. Mi zî cayê tantunî akerd. Bêguman destpêk de mi zehmetî ant. La nika êdî êdî karê mi nişt ro û qasê ke destê mi ra yeno hewl dana ke debara xo bikerî. Labelê pêwa tantunî paça û şorbeya nîske û arayî zî dana."

 

‘Her tim hewildayîşê min ê semedê xebate bî'

 

Zelîha dewam de wina vat: "Semedê karê keye û weykerdişê tutan mi îmkan nêdî ke ez tebera bixebityî. Ez bi serran zereyê keyeyî de menda. La nika çiqas emrê mi pîl bo zî ez teber de ya û karê teberî dir eleqedar bena. Ez xeylêk kêfweş a û bi kelecan a. Gama ke werdê mi hetê muşterîyan ra yenê ecibnayîş, xeylêk kêfê min yeno."

 

'Mi waşt ke zereyê keyeyî ra vejîyî'

 

Eynî wextî de xeylêk teybetmendîyê Zelîha zî estê ke ci dir eleqedar bibo. Zelîha wina vat: “Ez her tim mîyanê cigêrayîşî de bîya. Mi perwerdeyê kuaforî zî girewtibi. Ez zaf xêzkerdişê resiman ra hes kena, no çî zereyê mi de mendo. Mi tim waştêne ke serê dêsê dikanî de resiman viraznî."

 

‘Cesaret da derûdorê xo'

 

Zelîha tewr peyîn wina vat: "Mi bi karê xo cesaret û hêvî da derûdorê xo. Gama ke merdim karê xo ra hes bikero, do her wext serkefte bibo. Cinîyê ke zereyê keyeyî de manenê tim aciz benê û cuya teberî ra visinê. Gama ke mi dest bi karê esnafî kerd, xebera mi cuya teberî ra bî. Veng dana cinîyan ke wa pey xeyal û waştişê xo şêrê."