Mîdye Miqted

 

HELEB - Cinîyê ke reaksîyon vera qetilkerdişê sîyasetmedara kurde û pawitoxa heqanê cinîyan a bajarê Hesekê û Rojawanê Kurdistanî Firyal Silêman Xalide mojnayî û wina vatî: “Vera nê kerdoxan ê kiştoxê cinîyan de reyna zî cinîya kurde bi îradeyê xo hemverê faşîzm û sîyasetê lêşin de bena cewab. Cinî bi hêz û wezîfeyê xo pawitişê xo û ê komelî girewta serê milê xo. Ma bi şîdet kerdoxê derheqê cinîyan şermezar kenê û ganî kiştoxan ra hesab bêro persayîş.” 

 

Bajarê Kerkukî yê herêma Federal a Kurdistanî de bi suîkastêk xaîn sîyasetmedara kurde û pawitoxa heqanê cinîyan a bajarê Hesekî yê Rojawanê Kurdistanî ra Firyal Silêman Xalide ameye qetilkerdiş. Dimayê suîkastî ke hetê di kesan ra ameybî kerdiş, hêzê asayîşî dîyar kerdî ke derheqê qewimîyayîşî de tehqîqat dayî destpêkerdiş. Vera qetilkerdişê Firyale de xeylê cayan de çalakî ameyî organîzekerdiş. Şehba de zî çalakî vera qetilkerdişê cinîya kurde de ame viraştiş û cinîyan vatî ke ê do hesab kiştoxan ra bipersê.

 

'No reya yewine nîyo ke cinîya kurde bena hedef' 

 

Endama Koordînasyonê Kongra Starî ya bajarê Helebî Nêrgiz Bekire ajansê ma rê derheqê qetilkerdişê Firyale de wina qisey kerd: "Hedefgirewtişê cinîyan û reya peyêne hedefgirewtişê embaza Firyale sucê ewil ê derheqê cinîyan de nîyo. Bi taybetî cinîya xebatkar ya ke xo heme hetan de aver bena û têkoşînê xo berz kena, hedef yena girewtiş. La se beno wa bibo ma do zî rayîrê cinîyê têkoşer taqîp bikerê û pawitişê destkewtişanê xo bikerê." 

 

'Xîret kenê ke rayîrê averkewtişê cinîyan rê bigîrê' 

 

Dewamê qiseykerdişê xo de Nêrgize da zanayîş ke dewleta tirkan bi nê kerdişan û sucê xo xîret kena ke cinîya serkêşe bikera hedef û raşte ra wedarna û wina dewam kerd: “Dewleta tirkan her reye cinîya ke xebat û kar kena û bena serkêşa komelî, kena hedefê xo û bi rayîrê hedefgirewtişê xo rolê cinîyan wazena raşte ra wedarna û cinîyan qirkerdişî ra derbaz kena. Sewbîna wazena cinî reyna serenêwedarna. Coka ra her reye kerdoxanê hove pê ana.”

 

'Ganî hesab kiştoxan ra bêro persayîş' 

 

Peynîya qiseykerdişê xo de Nêrgize vat cinî wayîrê îradeyê xurtî ya û wina vat: "Pêwa reynakerdişê nê kerdişê derheqê cinyan de ancî zî cinîya kurde bi îrade hemverê faşizm û siyasetê lêşînî de bena cewab. Semedo ke cinî bi hêz û wezîfeyê pawitişê xo û komelê xo wurzena û daya serê milê xo. Ma bi şîdet nê kerdişê derheqê cinîyan de şermezar kenê û ganî hesab kiştoxan ra bêro persayîş." 

 

'Ma do wayîrê ercê pakrewananê xo vejîyê' 

 

Eynî wextî de Endama Rêxistina Sara ya Helebî Zeyneb Elîko zî reaksîyon mojna û vat: "Sîyasetê dewleta tirkan ya faşîste her reye hemverê îradeyê cinîyan wazeno berê hêz û averşîyayîşê cinîyan bigîrê. Bi taybetî cinîyanê siyasetmedaran kenê hedefê xo la ma sey cinîyê kurdî yê ke serê fehmê Rayberê Şarê Kurdî Abdullah Ocalanî de xebate kenê ma do têkoşînê xo berz bikerê û wayîrê ercê pakrewananê xo vejîyê ."