Melek Avci

 

ANQARA - Wendekara felsefeyî ya Îtalyaye Lucia Rossaye da zanayîş ke kitabê Ocalanî çîyê cîya cuya û bi înan reyde dest bi cipersayîşê derheqê sosyolojîyê Rojawanî kerda û wina vat: “Fikrê ci yê dînamîk nîşan dano ke tarîx peynî nêbîyo û verê her çîyî nîşan da ke seserrê 21ine de averberdişê fikrê sîyasî yê radîkal û demokratîke mumkun o.”

 

Tecrîdê giran ê serê Rayberê PKKyî Abdullah Ocalanî dewam keno. Hemleyê çareserî û azadîye ya ke 10ê Teşrîna Verêne de dest pêkerd zî her ke şino hîra beno. Xîretkerdişê hêzê komploger ê ke wazenê fikrê Abdullah Ocalanî tecrîd bikerê, veng vejîyenê. Wendekar û şaro ke Abdullah Ocalanî waneno no xîretkerdişê tecrîdê serê fikr û fehmî veng vejenê. 

 

Çarçeweya hemleyî de kitabe Abdullah Ocalanî xeylê cayan de ameyî vilakerdiş. Wendekara beşê felsefeye û aktivîsta paştîdayîşê Têgêrayîşê Kurd ê Îtalyaye Lucia Rossaye çîyê ke wendişê kitabe Abdullah Ocalanî qezenc kerda, ard ziwan.

 

'Averberdişê fikrê sîyasî yê radîkal û demokratîke mumkun o' 

 

Luciaye bale ant serê tecrîdî û vat ke tecrîd yeno manaya bêvengkerdişê fikr û fehmê merdiman û vat: “Tecrîd metodê bêvengkerdişê fikr û fehmê kesê şorişgêr o. Abdullah Ocalan nîşan da ke averberdişê fikrê sîyasî yê radîkal mumkun o. Seke mi vat tîya de çîyo esas pelçiqnayîşê fikr û fehmî yo û coka ra zî tecrîd sey metodêk yeno şuxilnayîş. Kitabê Abdullah Ocalanî de ma vînenê ke alternatîf est o. Fikre ci yê dînamîk nîşan dano ke tarîx peynî nêbîyo û her çî ra ver nîşan dano ke seserra 21ine de averberdişê fikrê sîyasî yê radîkal û demokratîke mumkun o.” 

 

'Garantorê xeta demokratîke Ocalan o' 

 

Luciaye da zanayîş ke sebebê vilabîyayîşê hemleya 10ê Teşrîna Verêne de yo ke seba azadîya fîzîkî ya Rayberê PKKyî Abdullah Ocalanî dîya destpêkerdiş no çî yo ke Abdullah Ocalan alternatîfan peşkeş keno û beno hêvî. Luciaye wina dewam kerd: “Sebebê vilabîyayîşê hemleyê 'Rayberê PKKyî rê azadî, meseleya kurdî rê çareserîya sîyasî" no yo ke sey hêvîyêke Rojawan yeno dîyîş. Garantorê xeta demokratîke Ocalan o. Coka ra zî şar paştîdayîş dano Ocalanî." 

 

'Verê cû ez raştê fikrêke wina polîtîk nêameya' 

 

Luciaye ya ke tewrê rojê wendişî ke çarçeweya kampanyaye de dîyayî destpêkerdiş bî û wina vat: "Bi wendişê kitabê Ocalanî çîyê cîya cuya mi de zêde benê. Ez unîversîte de wendekara felsefeyî ya. Verê cû ez qet raştê fikrêke wina yê polîtîk nêameya. Bi rojê wendişî munaqaşayê hîra ameyî kerdiş û kesê ke tewrê rojê wendişî bîyî, fikrê xo bi yewbînan reyde pare kerdî.”

 

'Nîno waştiş ke fikrê alternatîf aver bikewo' 

 

Luciaye da zanayîş ke tay kitabê Rayberê PKKyî Abdullah Ocalanî ke açarnayîşê ci yê Îtalî ameyî kerdiş verê cû wendbî û tewr zêde binê tesîrê babetê dewlete, sosyolojîyê azadîye de menda. Luciaye dîyar kerd ke dinya Abdullah Ocalanî wanena la Tirkîya nê kitaban bi sansurî reyde rî bi rî verdena û wina vat: "Abdullah Ocalan seba demokratîkbîyayîşî çareserîyan pêşkêş keno. Coka ra zî vera hegemonyaya dîktatortîya Erdoganî de nîno waştiş ke hişmendîyêk alternatîf aver bikewo. Coka ra zî nêwazenê kitabê Abdullah Ocalanî bêrê wendiş.”