MERKEZÊ XEBERAN - Çalakîya tepişteyê ke seba  azadîya fîzîkî ya Rayberê PKKyî Abdullah Ocalanî qerarê "boykotkerdişê dadgehe, pêvînayîşê keye û telefonî" de bî, roja 141ine de dewam kena.

 

Tepişteyê sîyasî yê zîndanê vakurê Kurdistanî û Tirkîya de çarçewaya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîk” de, 27ê Teşrîna Peyêne 2023ine de dest bi grevê vêşenîya bêdem û dore kerdibî. Tepişteyan dîyar kerdibî ke 4ê Nîsane de grevê xo peynî kenê û kewenê qonaxêke neweyî.

 

Tepişteyan eşkerayîya xo de wina vatî: “Ma wazenê neql bikerê ke ma do hemleyê xo yê ‘Azadî Rayber Apo rê, çareserîya demokratîke problemê kurdî rê' 4ê Nîsane û nata bi sloganê 'Cuya Rayberê xo dir eynî  şertî de' bi boykotkerdişê dadgehe, serdayîşê keye û telefonî bikerê.”

 

Çalakîya tepişteyê sîyasî roja 141ine de bi qonaxêke newe, bi çalakîya boykotkerdişê pêvînayîşê serê telefonî, keye û dadgehe dewam keno.