DÊRSIM - Kîbar Kose da zanayîş ke wexto ke mektebê mîyanên wendêne keyeyê Sakîne Cansize de kîra de mendêne û Sakîneye nê demî de xeylê çî ma rê musna. Kîbare vat ke dima ra Sakîne bi xebatê sîyasî bi taybetî zî seba cinîyan bîye nimune û wina vat: “Fikr û pratîkê aye zaf muhîm ê.” 

 

Rayîrberîyê Komeleya Elewîyan a Demokratîke (DAD) ra Kîbar Koseye da zanayîş ke wextê mektebê mîyanên de Sakîne Cansize nas kerda û destkewtişê cinîyan de tesîrê pratîkê sîyasî yê Sakîne Cansize est o. Kîbare wina dewam kerd: “Cigêrayîş û wendişê Sakîneye tesîrêk pîl serê ma de kerd. Ez mektebê sereyîn de bîya, bi wesîleya Sakîneye mi derheqê elewîtîye de kitab wendêne. Sakîne seba ma mana û muhîmîyêke pîl îfade kena. Ez venga heme cinîyan kena ke esasê pratîkê sîyasî yê Sakîneye de heqê xo bigîrê.” 

 

Kîbar Koseye qala wexto ke bi Sakîneye reyde cuyaya û derheqê cuya xo ya sîyasî ya dimayê Sakîneye şekil bîya de JINNEWSî rê ercanyîş kerd. 

 

‘Sakîne îdolê ma bî’ 

 

Kîbare naskerdişê Sakîne Cansize, teşwîqkerdişê wendişê kitabê derheqê elewîtîye de ercnayîş kerd û vat: “Mi mektebê mîyanên de Sakîneye nas kerd. Semedo ke mi aye nas kerde ez xo zaf bi şans vînena. Ma o wext keyeyê Sakîne Cansize de mendêne. Her tim bi ma reyde eleqeder bîyêne. Derheqê elewîtîye de zaf çî bi ma da musnayîş. Derheqê elewîtîye de kitab dayêne. Vatêne ‘biwanêne do seba şima zaf baş bo’. Wina hetkarîya ma kerdêne. Îdolê ma bî. Seba ma zaf muhîm û manayin bî. Ma xeylê çî aye ra musayê. Dima ra xora ma nuşte, çimdarîyê xo yê çapemenîye ra aye baş dî.” 

 

‘Cinîyê Dêrsimî têkoşînê aye nimune gênê’ 

 

Kîbare dewamê qiseykerdişê xo de vat: “Sakîne her şewe ameyêne keyeyê ma, ma zîyaret kerdêne. Vatêne şima kitab wend yan nê. Ma 3 cinî keye kîra kerdbî. Her şewe ameyêne kişta ma. Heta ge-ge vatêne şima qelsê. Zaf eleqeder bîyêne. Vatêne dersê xo bixebetê la kitaban zî biwanê. Ma kontrol kerdêne. Keyeyê aye zî sey aye bî. Her tim semedo ke ma wendekar bî, wayîrê ma vejîyayêne. Sakîne Cansize seba cinîyê Dêrsimî nimune ya. Cinîyê Dêrsimî aye sey nimune gênê.”

 

‘Naskerdişê aye ra sereberz a’ 

 

Kîbare wexto ke qala Sakîneye kena sey ‘can’ xîtab kena û wina qiseykerdişê xo peynî kerd: “Ganî cinî, hîna zêde falîyetê sîyasî de ca bigîrê. Ganî heme cinî têgêrayîşê sîyasî de ca bigîrê. Ganî her cinî tewrê xebatê sîyasî, mîtîng û çalakîyan biba. Ganî keyeyê xo de nêroşê. No seba Dêrsimî destkewtişêk pîl o. Naskerdişê Sakîneye vera ez zaf sereberza.”