Rozerîn Gultekîn

 

DÊRSIM - Çimeyê Munzurî ke gilê koyê Munzurî de ca gênê û qirkerdiş de şarî verika xo de nimit, efsaneyan rê bî babete û nika vera rantî de xover danê û çar demserrî de bi rindîya xo tesîrêke gird serê merdiman de kenê. 

 

Çimeyê Munzurî yê dewa Zîyaret ke 17 km qezaya Pulurî ya Dêrsimî ra dûrî ya û çimeyê Çemê Munzurî awan kena, bi nasnameyê xo yê pîroz vejîyena raşte. Çimeyê Munzurî de awe zinarê gilê koyê Munzurî ra herikîyena û tewirbîyayîşê nebatanê dorme rindî keno rindîya xo. Çimeyê Munzurî rindîya awe ya bi heybet peşkeşê meymananê xo keno û meymanê xo çimeyê zinaran de seba waştişê xo findan tafînenê. Goreyê efsaneyan Çimeyê Munzurî wina pê ameyo; dewêke gilê koyî de satilêk deste şivanê bi nameye Munzurî ra keweno û şitê mîyanê satilî rijîyeno. Dima ra şito ke rijîyo serê erdî beno awe û uca ra awe vejîyena û wina Çimeyê Munzurî vejîyenê raşte. 

 

Netîceyê xoverdayîşî de projeyê rantî betal bî 

 

Her serre Tirkîya, Kurdistan û xeylê cayanê dinya ra kes yenê seba dîyîşê Dêrsimî. Yew cayê pîroz yê Dêrsimî çime yê. La bi bahaneyê ‘lêşinîya dorme çareser bikerê’ binê kordîneyê Walîtîya Dêrsimî de hetê Ajansê Averberdişê Firatî (FKA) ra proje ame amadekerdiş. Proje aşma hezîrana 2019î de hetê Heyetê Herême ya Pawitişê Bîyayîşê Kulturî yê Erziromî ra ame tesdîqkerdiş. Seba projeyî do 8 mîlyon lire bêro xerckerdiş. Seba projeyî şarê herême de hemkarî nêame kerdiş û çarçeweya projeyî de di pirdê çelîk yê serê awa Munzurî, di otopark, unîteyê standê campîng, cayê seyran û serebirnayîşê qurbanan ameyêne plankerdiş. Ameyêne amanckerdiş ke dekewtişê çimeyan zî bi pere bibo. Seba projeyî avûkatan muracat kerd. Vera muracatan ke no proje bêro vindarnayîş, seba betalkerdişî zî 13ine Daîreya Daniştayî de dewa ameye akerdiş. Netîceyê dewaye de mehkema qerarê betalkerdişê projeyî da. 

 

 

Vera her çîyî bîyayîşê xo paweno 

 

Raşteyê Çimeyê Munzurî de 40 heb çime est ê. Raşteyo ke Çimeyê Munzurî tede yê de Raşteyê Sirbûnî de zî ca gêno. Kesê ke yenê zîyaretê çimeyan waştişanê xo pêşnîyaz kenê û findan tafînenê. Çimeyê Munzurî ke gilê koyê Munzurî de ca gênê û qirkerdiş de şarî verika xo de nimit, efsaneyan rê bî babete û vera rantî de xover danê û çar demserrî de bi rindî û heybete xo tesîrêk gird serê merdiman de verdenê.