MERKEZÊ XEBERAN - Dewleta tirkan reyke bîn hevalanê ma yê rojnamegeran kerd hedef. Hêrişê teyareyê bêmerdim û biçeke Tirkîyaye, mûxabîra ajansê ANHAyî Cîhan Bîlgîn û rojnameger Nazim Daştan dinyaya xo bedelnayî.

 

Mûxabîra ajansê ANHAyî Cîhan Bîlgîn û rojnameger Nazim Daştan ke 8ê Kanûne (2024) ra Awbendê Tişrîn û Pira Qereqozaqî de hêrişê dewleta tirkan, komê girêdayeyê dewleta tirkan û xoverdayîşê hemverê înan de taqîb kerdêne, bîyî hedefê hêrişê teyaranê dewleta tirkan. 

 

Rojnamegere Cîhan Bîlgîn û Nazim Daştan vizêrî (19ê Kanûna 2024ine) wexto ke karê xo yê rojnamegerî kerdêne, saete 15.20ine de, rayîrê mabêne Awbendê Tişrîn û bajarokê Sirînî de wesayîtê înan hetê teyareyêk bêmerdim û biçeke yê dewleta tirkan ra ame bombavarankerdiş. Netîceya hêrişî de her di rojnamegeran zî dinyaya xo bedelnayî û şofirê wesayîtî Ezîz Hec Bozan zî birîndar bi.