Derya Ren-Şehrîban Aslan

 

RIHA - Mûxabîra ANHAyî Silava Abdulrehman dîyar kerd ke rojnamegere Cîhan Bîlgîn ke bi SÎHAyê Tirkîya ra ameye qetilkerdiş, vernîya ke bêro qetilkerdiş, bi desine rey bi telefonê hetê Tirkîya ra ameya tehdîtkerdiş û vat: “Cîhane teslîmîyet qebûl nêkerd. Nê semedî ra hedef ameye girewtiş û qetil kerdî.” Bêrîtan Canozer zî dîyar kerd ke rojnameger Nazim Daştan û Cîhan Bîlgîne bi zanebîyayîş hedef ameyî girewtiş û vat: “Ma ganî israrê înan ê rojnamegerîye pîl bikerê.”

 

Tirkîya 5 serranê peyînan de netîceya hêrişê herêma Başûrê Kurdistanî, Vakur û Rojhelatê Sûrîye de 13 rojnamegerî qetil kerd û 7 zî birîndar kerd. 19ê Kanûne de rojnameger Nazim Daştan û Cîhan Bîlgîne ke xeberan taqîb kerdêne, mabêne Awbendê Tişrîn û bajarokê Sîrîn de hetê teyaranê bêmerdim (SÎHA) yê Tirkîya ra hedef ameyî girewtiş û ameyî qetilkerdiş.

 

Mûxabîra Ajansê Xeberan ê Hawarî (ANHA) Silava Abdulrehman û rojnamegere Bêrîtan Canozer, qalê Cîhan Bîlgîne û Nazim Daştanî kerdî.

 

‘Cîhane barê çar parçeyê Kurdistanî wedarnabî’

 

Silava Abdulrehman da zanayîş ke 8 serrî aye û Cîhan Bîlgîne pîya şuxilyayê û vat: “Şehadetê Cîhane semedê ma zaf giran bî. Cîhane her çar parçeyê Kurdistanî wedarnabî. Binê serdestîyê dewleta îşxalkerdeye de ameye dinya. Nê semedî ra tutîya xo ra hêrsê aye awan bîbî. Cîhane waştêne bi qeleme û kameraya xo kurdan dinya de bido şinasnayîş. Ma dişminîyê hemverê kurdan çiqas qalî bikerê zî kêm maneno. Semedo ke polîtîkaya çinkerdişî dewam kena.”

 

Cîhane destan awan kerd

 

Silava Abdulrehman wina dewam kerd: “Cîhane karê komelî de zî xeylê xurt bîye. Têkilîyê aye tutan dir xeylê baş bî. Dayîkan dir baş bî. Ez çiqas qalê Cîhane bikerî kêm maneno. Aye destan awan kerd. Ça de xeberî bibayîne, ewil şîne. Hemleyê Tebqa û Reqayî de ca girewte. Til Temirî de xebate kerd. Şî Minbic. Badê zî derbazê Tişrîn û Qarakozaxî bîye.”

 

‘Ma do xeyalanê aye bica bîyarê’

 

Silava Abdulrehman tewr peyîn wina vat: “Vernîya ke bêro qetilkerdiş, fermandara YPJî Roj Engîzek dir roportaj kerd. Hewl ame dayîş ke serê qetilkerdişê Cîhane û Nazimî bêro padayîş. La heqîqet tarî nêmaneno. Çi kenê wa bikerê nêeşkenê îradeyê ma çin bihesibnê. Ma do wayîrê xeyalanê înan vejîyê, ma do qeleme û kameraya înan erdo nêverdê.”

 

‘Nêwaştî heqîqet vejîyo werte’

 

Bêrîtan Canozer zî da zanayîş ke aye Cîhane û Nazimî bi rêzdarî ana xo vîr û vat: “Têkoşînê înan do her tim vernîya ma roşn bikero. No reya ewil nîyo ke ma hevalanê xo vînî kenê. Çi heyf, verê zî bi desine hevalê ma hetê dewleta tirkan ra hedef ameyî girewtiş û qetilkerdiş. Dewleta tirkan teberê sînorî de zî hêriş kena û rojnamegeran hedef gêna. Rojawanî de 2013ine ra heta nika bi destê çeteyan hêrişî pê yenê. Bi desine hevalê ma wexto ke şuxilyayîne ameyî qetilkerdiş. Nazim û Cîhane şîyî Rojawan û uca de nimûneyê bi heybetî yê rojnamegerîye dayî ciwîyayîş. Rojawanî bi dinya dayî eşnawitiş. Binê hêrişan de şuxilyayî. Kamera û qelema xo destê xo ra nêvistî. Nika ganî ma rayîrê înan de bibê. Ma israrê xo her wareyî de pîl bikerê.”

 

‘Roja ewilî ra bêmabên şuxilyayî’ 

 

Bêrîtan Canozer wina qedêna: “Mi hem Nazimî hem zî Cîhane nas kerdêne û ma pîya şuxilîyenê. Mi eleqeyê înan yê semedê meslegî vîna. Nazimî meslegê xo ra hes kerdêne, têkilîyê ey şarî dir zaf baş bî û têkoşînê xo her hetî ra kerdêne. Semedê tedayê dewlete û semedo ke bibo şahidê şorişê Rojawan şî uca. Roja ke şî uca bêmabên şuxilîya. Kedêke pîl da. Şertê zehmetî de şuxilîya. Ma ewro qelema Nazimî û Cîhane dewr girewt. Berpirsîyarîyêk pîl keweno milê ma ser. Ma do xeberanê xo hîna xurt viraznê.”