Zelal Tunç

 

WAN - Endama Heyetê Îdarekarîyê Herêmî ya HDPyî ya Wanî Oznur Evin derheqê serra 4ine ê tayinkerdişê qeyûman û weçînayîşê herêmî ser o vat: “Ganî cinî hemverê polîtîkayê AKPyî ke dişminîya cinî kenê de hîna zêde bêrê têhet, mîyanê paştdayîşî de bê û ganî weçînayîşê herêmî de cinî tewr zêde bibê namzed. Ma do destkewtişê xo zêde bikerê û nêverdê camêrdî destkewtişê ma destê ma ra bigîrê."

 

19ê Tebaxa 2019ine de bi talîmatê Wezaretê Karê Zerreyî qeyûm tayînê hîrê şaredariyê ke destê HDPyî de yê Wan, Amed û Mêrdînî ameyî kerdiş. Serê tayinkerdişê qeyûman 5 serrî derbaz bî. Bi rayîrê qeyûman sîstemê hemserekî û destkewtişê cinîyan bî hedef. Nika weçînayîşê herêmî rojeve de yê û texrîbatê qeyûmên tayînê şaredariyê bajarê Kurdistanî ameyî kerdiş, dewam kenê.

 

Endama Heyetê Îdarekarîya Herêmî ya HDPyî ya Wanî Oznur Evin derheqê serra 4ine ê tayinkerdişê qeyûman û weçînayîşê herêmî de ercnayîş kerd. 

 

'Kesê ke hetê şarî ra ameyî weçînayîş zîndan de yê’

Oznure dîyar kerd ke înan paradîgmaya têduştîya cinsî, ekolojîk û demokratîk caardê û serê nê esasî de modelê hemserekî zî caardê û wina vat: "Serê waştişê şarî de lazimîyêke wina vejîya. Kurdistan de xeylêk cinî tewrê mekanîzmayê qerarî ameyî kerdiş. Labelê ma bi darbeyê qeyûman rî bi rî mendî. Hemverê endamê meclîsan, hemserekan cipersayîş ame akerdiş, ameyî destbendkerdiş û tepiştiş. Kesê ke hetê şarî ra ameyî weçînayîş, zîndanan de yê.”

 

'Qeyûm hewl da ke cinî keye de hepis bikero'

 

Oznure da zanayîş ke sebebê bingehîn ê tayînkerdişê qeyûman "destkewtişê cinîyan o" û wina vat: "Sebebê bingehîn ê zextan, temsîlkarîyê têduşt ê cinîyan o. No çî seba ke kerdoxê sîyasetê ma yo, coka zî zextan kenê. Formulê temsîlkarîyê têduştî verê ma de 'hemserekî ya'. Qeyûm hewl da cinî keye de hepis bikero. Qeyûm darbeyêk o."

 

'Cinî her raşteyê cuye de yê'

 

Oznure da zanayîş ke înan demê bi sîstemê hemserekî de xeylêk şaredarî bi dest kerdê û dimayê ke cinîyan îdarekarî kerda dest, cinî her raşte de ameyê cakerdiş û wina vat: "Reya ewil hîn neslegî hetê cinîyan ra ameyî ceribnayîş. No serdemê ma de ame kerdiş. Cinîyan karê şofirî de wesayîtan de ca girewtî. Berpirsîyarîyê garaj û otoparkan girewtî xo ser. Cinîyan raşteyê îstihdamî awan kerdî. Qezayî newe ra ameyî dîzaynkerdiş. Cinîyan berardişê xo bi xo ramitî û dima ra pere nê ra qezenc kerdî. Binê banê her şaredarî de 'Mudurîya Polîtîkayê Cinîyan' ame awankerdiş. Cinîyan bi nê çî bawerîya bi xo zêde kerdî."

 

'Tayînkerdişê qeyûman şîdet zêde kerd'

 

Oznure da zanayîş ke bîyayîşê cinîyan ê şaredarî bî sebebê averşîyayîşî û wina vat: "Seba qayûman no sey tehlûkeyêk ame vînayîş. Coka zî sebebê tayinkerdişê qeyûman yew ci ra hedefgirewtişê destkewtişê cinîyan bî. Hedefêke ma yê sereyîn peynîkerdişê şîdetê serê cinî de bi. Labelê dimayê ke qayûm tayînê şaredariyê Kurdistanî ame kerdiş, şîdetê serê cinî zêde bî."

 

'Ma do destkewtişê xo zêde bikerê'

 

Oznure vat, ê çiqas bi tayinkerdişê qayûman rî bi rî mendê zî ê do destkewtişanê xo pîl bikerê û wina vat: "Amancê ma oyo ke ma şaredariyan reyna bi sîstemê hemserekî rayra berê. Ganî cinî hemverê polîtîkayê AKPyî ke dişminîya cinî kenê de hîna zêde bêrê têhet, mîyanê paştdayîşî de bê û ganî weçînayîşê herêmî de cinî tewr zêde bibê namzed. Ma do destkewtişê xo zêde bikerê û nêverdê camêrdî destkewtişê ma destê ma ra bigîrê.”