NAVENDA NÛÇEYAN - Wezareta Dadê ya Talîbanê ragihand ku bi ‘Yasaya Ragihîner’ re zilm û qedexeyên li ser jinan hatine mezinkirin. Li gorî vê yasayê, mêr wekî ‘hikumdarê’ jinan tên nîşandan, jin mecbûr in ku li gorî daxwazên mêrên xwe tevbigerin.

 

Li Efganistanê, rejîma Talîbanê tebeqeyeke din li zilm û qedexeyên xwe yên li ser jinan zêde kiriye. Talîbanê rêziknameyên nû bicîh kirine ku rewşa jinan di nav malbatê de û têkiliyên wan bi mêran re birêve dibin.

 

Wezareta Dadê ya Talîbanê ragihand ku "Yasaya Ragihîner", ku ji pêşgotinek û şeş beşan pêk tê, ji hêla rêberê Talîbanê Hîbatullah Akhundzada ve hatiye îmzekirin û bi weşandina wê di rojnameya fermî de ketiye meriyetê.

 

Mêr wekî ‘hikumdar’ hatin pênasekirin

 

Li gorî rêziknameyên nû, mêr berpirsiyar in ku piştrast bikin ku jinên "di bin çavdêriya wan de" pabendî rêziknameya cil û bergên Talîbanê ya diyarkirî ne. Qanûn mêr wekî "rêvebir" an ‘hakim’ ê jinê pênase dike.

 

Erk û sînorên nû yên ji bo jinan

 

Beşa yasayê ya bi sernavê "Mafên Mêr û Jinê" dibêje ku jin divê di "mesele Îslamî" de guh bidin mêrên xwe. Heman beş her wiha erkê li ser jinan ferz dike ku mêrên xwe "bextewar" bihêlin û "ji bo kirinên qenc ên ku ji wan re hatine kirin spasdar" bin.

 

Ev rêzikname desthilatdariya mêran li ser jinan a di nav malbatê de xurt dike û di heman demê de rê dide mêran ku bi gelek jinan re bizewicin.