NAVENDA NÛÇEYAN  - Rojnameya Yenî Ozgur Polîtîkayê ragihand ku ew rengê weşana xwe diguherînin û bang li nivîskar, wergervan û hemû kedkarên Kurdî kir ku tevkariyê li vê weşanê bikin.

 

Rojnameya Yenî Ozgur Polîtîka ku li Almanyayê tê weşandin û li Ewropayê tê belavkirin, hewl dide weşana xwe ya Kurdî xurtir bike.

 

Bi vê armancê jî bangek li nivîskar, wergervan û her kesên bi Kurdî re eleqedar kir.

 

Bangawaziya rojnameyê bi vî rengî ye:

 

"Hevalên hêja, nivîskar, wergervan û hemû kesên ku bi Kurdî re eleqedar in.

 

Em wekî Edîtoriya Çand û Hunerî ya rojnameya Yeni Özgür Politika bi kelecaneke mezin radigihînin ku em rengê weşana xwe diguherînin. Heta ji me tê em ji nûçeyên rûtîn dûr dikevin. Em dixwazin rûpelên çand û hunerî bi naverokên çandî, hunerî, wêjeyî, tenduristî, civakî, dîrok, ekoloji, rexneyî geş û xurttir bikin da ku xwendevanên me jî bi kêfxweşî wan bixwînin.

 

Ji bo vê nûbûnê em bang li we dikin:

 

Nivîskarên ku dixwazin gotarên taybet, kurteçîrok, helbest, gotinên rexneyî an jî nivîsên wêjeyî bişînin,

Wergervanên ku dixwazin berhemên edebî, çandî û hunerî yên ji zimanên din wergerînin Kurdî,

Rexnegirên ku dixwazin pirtûk, fîlm, pêşangeh, konser, şano û bûyerên çandî bi awayekî kûr û profesyonel binirxînin.

Em bi taybetî li nivîsên ku Kurdiya wan zindî, xweşik û dewlemend e digerin. Her nivîsek ku hûn bişînin dê alîkariya me bike ku rûpelên me hê xurttir bibin û xwendevanên me jî kêfxweş bibin.

 

Nivîs, werger û nirxandinên xwe ji kerema xwe re bişînin vê maîlê; kurdi

 

Em ê hemû nivîsên ku bigihîjin me bi baldarî bixwînin û yên ku li gorî standardên me bin di rojnameyê de bi navê we biweşînin.

 

Em bi dilgermî li benda nivîsên we yên bi çêjn, afirîner û Kurdî-xurt in. Bi hev re em rûpeleke çandî ya ku bi rastî tê xwendin û tê hezkirin ava bikin!

 

Bi rêzdarî û hezkirinek mezin em ji niha de dibêjin mala we ava.

 

Edîtoriya Çand û Hunerî/Rojnameya Yeni Özgür Politika"