ÊLIH - Li gundê Tilhesênê, tirîyên ku ji rezan tên çinîn bi saya xebata bi saetan dibe dims. Meyase Arslan, bal kişand ser lêçûnên zêde û zirara ku ji ber baranê li ser tirî çêbûye û got ew bi hevkariyê hilberînê didomînin.

 

Li gundê Tilhesên ê navçeya Kercewsa Êlihê, xelk bi hevkariyeke mezin tirîyên ji rezan berhev dikin, piştre dikin dims. Bi vê keda hevpar xwe ji bo zivistanê amade dikin. Amadekarî saet di 5:00'ê sibehê de dest pê dike. Jin ji nav rezan tirî berhev dikin, dawiyê agir pêdixin da ku dimsê çêbikin. Piştî ku tirîyên berhevkirî têne eciqandin û parzûnkirin, pênc-şeş saetan têne kelandin. Ev pêvajoya ku gelek kedê dixwe, ji lênêrîna rezan bigire heya amadekirina dimsê, tevî lêçûnên zêde û zirara ku ji ber baranê li tirî çêdibe, bi hevkariyan berdewam dike. Meyase Arslan, ku qonaxên çêkirina dimsê vegot, zehmetiyên ku ew di dema hilberînê de pê re rû bi rû dimînin û girîngiya hevgirtinê parve kir.

 

'Em alîkariya hev dikin'

 

Meyase Arslan qonaxên hilberîna dimsê diyar kir û got, "Em kevirekî li binê quşxaneyê datînin da ku tiştên qirêj ên di hundir de derkevin jor. Bi saya wî kevirî, dims paqijtir û çêtir dibe. Dema ku dims dikele, em kefa wê digirin. Ew nêzîkî 5-6 saetan dikele. Kef piştî demek diyarkirî winda dibe û êdî ne hewce ye em kefê bigirin. Kes ji derve nayê alîkariyê, em alîkariya hev dikin."

 

Lêçûnên zêde hilberînê dijwar dikin

 

Meyase Arslan diyar kir ku ew dimsê ji xwe re dihêlin a zêde jî difiroşin û got baranê bandorek neyînî li ser tirî kir. Meyase Arslan got, "Di destpêkê de, tirîyên me baş bûn, lê piştî baranê, ew xera bûn. Bê guman, her tişt li gorî sala borî bihatir e. Em 3-4 caran rez cot dikin û derman dikin. Hiştina wan bi tena serê xwe ne vebijarkek e; divê em lênêrîna rezên xwe bikin. Bê guman, ew karekî dijwar e."